Yamal thumbon Kane dhe Mbappen: Topi i Artë është për më të mirin, jo për golashënuesin dhe fituesin e Championsit

Lamine Yamal ka ndezur sërish garën për Topin e Artë me një deklaratë që është interpretuar si një thumbim ndaj Harry Kane dhe, në mënyrë indirekte, ndaj Kylian Mbappé.

Ylli i Barcelonës ka folur hapur për mënyrën se si, sipas tij, duhet të vlerësohet fituesi i Topit të Artë. Sipas Yamal, çmimi individual nuk duhet t’i jepet automatikisht futbollistit që shënon më shumë gola apo atij që fiton Ligën e Kampionëve.

“Topi i Artë është për lojtarin më të mirë në botë, jo për fituesin e Champions League apo për atë që shënon më shumë gola”, është shprehur Yamal në një intervistë për Movistar Plus Deportes.

19-vjeçari e ka bërë edhe më të qartë qëndrimin e tij duke iu referuar një sulmuesi që ka regjistruar shifra të jashtëzakonshme gjatë sezonit të kaluar.

“Nëse shënon 80 gola, nuk do të thotë automatikisht se je lojtari më i mirë. Për këtë ekziston çmimi i golashënuesit më të mirë”, tha ai.

Kjo deklaratë është interpretuar si një thumbim ndaj Harry Kane, i cili sezonin e kaluar realizoi 73 gola në të gjitha garat me Bayern Munichun dhe Kombëtaren e Anglisë, duke fituar edhe Këpucën e Artë.

Megjithatë, rivaliteti i Yamalit për Topin e Artë nuk lidhet vetëm me Kane. Në garën për çmimin prestigjioz, spanjolli është përballur edhe me Kylian Mbappén, me të cilin vetë Yamal ka thënë se e konsideron veten në të njëjtin nivel.

“Mbappé dhe unë jemi dy lojtarët më të mirë në botë. Kjo është shumë e qartë për mua dhe për të gjithë ata që shikojnë ndeshjet, por mendoj se këtë vit e meritoj unë”, kishte deklaruar Yamal pak ditë më parë.

Sinjali – aty ku e vërteta flet para lajmit!

/GazetaSinjali/