1 orë më parë
Të rinj që morën pjesë në plaçkitjet gjatë protestave të fundjavës në Francë kanë publikuar video në TikTok dhe X, ku mburren me mallrat e vjedhura dhe përplasjet me policinë.
“Faleminderit Paris, faleminderit Paname”, thotë një i ri në njërën prej videove në TikTok, duke përdorur një emërtim zhargon për kryeqytetin francez.
“Jeni vrasës, djema, i shkatërruam të gjitha”, shton ai.
Me sytë e skuqur, me sa duket nga gazi lotsjellës, i riu tregon çfarë ka marrë gjatë plaçkitjeve, duke përmendur edhe veshje sportive të markës amerikane Under Armour.
Më pas, ai u drejtohet forcave speciale të policisë CRS, duke u mburrur se i kanë mposhtur gjatë përleshjeve. Në fund, e mbyll videon me fjalët: “Gjenerata Z, respekt”.
Në një tjetër video, një i ri shpjegon pse iu bashkua plaçkitjeve. Ai thotë se fillimisht kishte dalë për të protestuar kundër çmimeve të karburanteve, pasi nëna e tij ka veturë, por përfundoi duke marrë rroba dhe mallra nga një dyqan sportiv.
“Në fund, kursen para duke plaçkitur”, shprehet ai.
I pyetur për mendimin e tij për Francën, i riu thotë se vendi është racist dhe se të gjithë duhet të jenë të barabartë.
Ai pretendon se më herët gjatë ditës një restorant nuk e kishte lejuar të hynte, ndërsa kishte pranuar një person francez.
“Nëse vazhdojmë kështu, do të ketë kaos”, vazhdoi ai.
Ndërkohë, ministri i Brendshëm i Francës, Laurent Nuñez, pranoi se policia kishte humbur kontrollin në disa qytete gjatë protestave.
“Të shtunën, në disa qytete të mëdha, nuk mund t’i shikoje tregtarët në sy dhe t’u thoshe se nuk e kishim humbur kontrollin, pasi qindra dyqane ishin plaçkitur”, deklaroi ai.
Nuñez pranoi gjithashtu se kishte pasur mungesë të parashikimit në vendosjen e forcave të sigurisë.
Sipas tij, rreth 60 mijë policë dhe xhandarë ishin angazhuar në mbarë vendin, por ky numër nuk kishte mjaftuar për të përballuar turmat dhe grupet e përfshira në dhunë.
Ministri tha se, duke pasur parasysh dëmet e shkaktuara, kishte ofruar dorëheqjen, por presidenti Emmanuel Macron nuk e kishte pranuar atë.
Protestat, ku rreth gjysmë milioni njerëz marshuan kundër rritjes së kostos së jetesës, u shndërruan në disa prej episodeve më të rënda të dhunës në Francë gjatë viteve të fundit.
Ndërtesa publike dhe dyqane u plaçkitën e u dogjën, ndërsa në Paris grupe personash të maskuar thyen biznese, morën cigare, syze, veshje, bizhuteri dhe produkte ushqimore.
Sipas Alain Di Crescenzo, presidentit të Dhomës së Tregtisë, më shumë se 2 mijë dyqane në mbarë vendin mund të jenë prekur nga trazirat. Dëmet, sipas tij, arrijnë në “qindra miliona euro”.
Mbi 2,500 persona u arrestuan, ndërsa afro 1,000 pjesëtarë të forcave të sigurisë u lënduan. Të lënduar pati edhe mes protestuesve. /Telegrafi/
