10 orë më parë
Policia e Kosovës ka arrestuar 14 persona gjatë 24 orëve të fundit, ndërsa tetë të tjerë janë dërguar në mbajtje, sipas raportit të incidenteve dhe ngjarjeve policore të datës 17 tetor 2026.
Gjatë kësaj periudhe janë raportuar raste të ndryshme kriminale, përfshirë lëndime trupore, dhunë në familje, kanosje, armëmbajtje pa leje, kontrabandë me mallra dhe kontrabandim me migrantë.
Një nga rastet është regjistruar në Fushë Kosovë, ku njësitë e Sektorit të Hetimeve të Policisë Kufitare kanë ndaluar një automjet transportues, në të cilin ndodheshin dy persona të dyshuar.
Gjatë kontrollit janë gjetur sasi të konsiderueshme mallrash të kategorive të ndryshme, përfshirë barna, produkte higjienike, bizhuteri, veshmbathje, pajisje teknologjike, kompjuterë, laptopë dhe telefona celularë.
Të dyshuarit kanë deklaruar se mallrat i kishin sjellë nga Maqedonia e Veriut, por nuk kanë paraqitur dokumentacion që dëshmonte importin e tyre të ligjshëm. Përveç mallrave, policia ka sekuestruar edhe automjetin transportues. Me vendim të prokurorit, të dyshuarit janë arrestuar dhe dërguar në mbajtje.
Raste të armëmbajtjes pa leje dhe të shtënash me armë
Raste të armëmbajtjes pa leje janë regjistruar edhe në Prishtinë, Obiliq dhe në rajonin e Gjakovës.
Në rrugën “Ahmet Krasniqi” në Prishtinë, policia ka ndaluar një automjet me dy persona, ku gjatë kontrollit janë gjetur një pistoletë me pesë fishekë dhe një thikë.
Ndërkaq, në rrugën “Hasan Prishtina” në Obiliq, gjatë kontrollit të një veture janë gjetur dhe konfiskuar një armë, një karikator, nëntë fishekë dhe një shufër metalike.
Në fshatin Mazrek të Gjakovës, policia ka ndaluar një veturë, ku ka gjetur një armë të gjatë automatike, 27 fishekë dhe një karikator. Gjatë kontrollit në shtëpinë e të dyshuarit janë gjetur edhe 102 fishekë të tjerë.
I dyshuari është arrestuar dhe, me urdhër të prokurorit, është dërguar në mbajtje për 48 orë.
Ndërkohë, në Podujevë janë raportuar dy raste të të shtënave me armë gjatë ahengjeve familjare. Në të dy rastet janë sekuestruar pistoleta me gaz dhe gëzhoja, ndërsa të dyshuarit janë liruar në procedurë të rregullt pas intervistimit.
Raste të dhunës në familje dhe lëndimeve trupore
Në Gllogoc, policia ka arrestuar një person të dyshuar për lëndim të rëndë trupor. Sipas raportit, ai dyshohet se, së bashku me dy persona të tjerë, e kishte sulmuar fizikisht një viktimë, duke i shkaktuar lëndime trupore. Viktima është dërguar për trajtim mjekësor, ndërsa i dyshuari është dërguar në mbajtje me vendim të prokurorit.
Një rast tjetër është raportuar në Gllogoc, ku një person dyshohet se ka sulmuar fizikisht babanë e tij. I lënduari ka pranuar trajtim mjekësor, ndërsa i dyshuari është dërguar në mbajtje.
Në Graçanicë, një person është arrestuar nën dyshimin se, pas një mosmarrëveshjeje, kishte shqetësuar nënën e tij dhe kishte demoluar derën e shtëpisë. Gjatë kontrollit në dhomën e tij janë gjetur dhe konfiskuar dy thika dhe një elektroshok. Me vendim të prokurorit, ai është dërguar në mbajtje.
Ndërsa në Podujevë, policia ka arrestuar një çift bashkëshortor pas një mosmarrëveshjeje që kishte përfunduar me zënkë dhe kanosje. Të dyshuarit janë dërguar në qendrën e mbajtjes me vendim të prokurorit kujdestar.
Dy të mitura raportohen të zhdukura në Gjilan
Një rast i zhdukjes së dy të miturave është raportuar në fshatin Livoç i Epërm të Gjilanit.
Sipas policisë, familjarët kanë njoftuar se dy vajzat kishin dalë së bashku dhe se nuk dihej vendndodhja e tyre. Rasti është duke u hetuar.
Dyshime për kontrabandim me migrantë dhe transport ilegal të mishit
Në fshatin Dobresh të Vitisë, policia ka ndaluar një veturë me shtatë persona. Gjatë identifikimit është konstatuar se, përveç shoferit kosovar, në automjet ndodheshin edhe gjashtë persona të cilët, sipas deklarimeve të tyre, ishin shtetas të Bangladeshit dhe nuk kishin dokumente me vete.
Shoferi ka deklaruar se personat e huaj i kishte sjellë në Kosovë nga Maqedonia e Veriut përmes rrugëve ilegale. Pas intervistimit, ai është liruar së bashku me veturën, ndërsa personat e huaj janë trajtuar nga njësitë përkatëse dhe u është lëshuar vërtetimi për akomodim në përputhje me ligjin.
Ndërkaq, në fshatin Novosellë të Kamenicës, policia ka ndaluar një veturë që transportonte 160 kilogramë mish pa dokumentacion përcjellës. Mishi i konfiskuar i është dorëzuar Agjencisë së Ushqimit dhe Veterinarisë për procedura të mëtejshme.
Në Prishtinë, në lagjen e Gjelbër, është raportuar edhe një vjedhje e rëndë. Sipas ankuesit, persona të panjohur kishin hyrë me forcë përmes dritares në shtëpinë e tij, prej nga kishin vjedhur stoli ari dhe para. Rasti është duke u hetuar.
Në rajonin e Mitrovicës së Jugut është raportuar një rast kanosjeje në Skenderaj, ndërsa në pikën kufitare të Jarinjës është arrestuar një shtetas i Serbisë, në bazë të një urdhërese gjyqësore, dhe është dërguar në vuajtje të dënimit.
Statistikat e policisë për 24 orë
Sipas statistikave të përgjithshme të Policisë së Kosovës, gjatë kësaj periudhe janë regjistruar tetë aksidente trafiku me persona të lënduar dhe 23 aksidente me dëme materiale. Nuk është raportuar asnjë aksident trafiku me fatalitet.
Policia ka shqiptuar 2.283 tiketa trafiku, ndërsa 14 persona janë arrestuar, tetë janë dërguar në mbajtje dhe një person është dërguar në vuajtje të dënimit./Telegrafi/
