4 ditë më parë
Punëtorët teknikë të shkollave fillore në Prishtinë do të rikthehen në grevë nga e mërkura, për shkak të mospagesës së pagave në përputhje me vendimin e Qeverisë së Kosovës dhe vonesave në ekzekutimin e tyre.
Vendimi është marrë në një takim me përfaqësuesit e punëtorëve teknikë të shkollave fillore dhe të mesme, si dhe me përfaqësuesit e punëtorëve teknikë dhe të sigurimit fizik të Qendrave të Mjekësisë Familjare (QMF) në Prishtinë.
Sipas Federatës Sindikale të Punëtorëve Teknikë të Sektorit Privat të Kosovës, greva do të vazhdojë deri në përmbushjen e kërkesave për pagesën e pagave dhe të gjitha obligimeve të mbetura.
Krahas grevës, punëtorët kanë paralajmëruar protestë të premten, më 16 tetor, nga ora 11:00 deri në orën 12:00, para objektit të Komunës së Prishtinës.
Protestës pritet t’i bashkohen edhe punëtorët e sigurimit fizik të QMF-ve, të cilët, sipas federatës, kanë më shumë se dy javë pa marrë pagat.
Federata ka bërë të ditur se mundësia e pjesëmarrjes në protestë është duke u shqyrtuar edhe nga punëtorët teknikë të QMF-ve të Prishtinës.
Ndërkohë, punëtorët teknikë të shkollave të mesme tashmë janë në grevë. /Telegrafi/
