Pse të rinjtë po e përdorin vape-in edhe pa qenë duhanpirës?

Mbi një milion persona në Mbretërinë e Bashkuar thonë se nuk kanë pirë kurrë duhan, por tani përdorin cigare elektronike, ndërsa numri i tyre po rritet nga viti në vit, sipas të dhënave të fundit të Zyrës për Statistikat Kombëtare (ONS).

Një prej tyre është Gracey Mungulu, e cila fillimisht e konsideronte përdorimin e vape-ve po aq të pakëndshëm sa pirjen e duhanit. Megjithatë, kur përdorimi i tyre u bë gjithnjë e më i zakonshëm mes shokëve dhe shoqeve të shkollës, ajo nisi t’i provonte në moshën 16-vjeçare.

Sot, në moshën 21-vjeçare, Gracey blen çdo ditë një vape të rimbushshme dhe e përdor sa herë që duart nuk i ka të zëna me punën e saj si parukiere apo me angazhimet në shkollë.

Ajo thotë se fillimisht nuk arrinte as ta thithte avullin pa kollitur, por me kalimin e kohës u mësua me të, derisa përdorimi u bë pjesë e vazhdueshme e përditshmërisë së saj.

Gracey beson se vape-t e ndihmojnë kur përjeton ankth në situata shoqërore. Sipas saj, ndjesia e të pasurit diçka në dorë apo në gojë e bën këtë zakon veçanërisht tërheqës.

Megjithatë, ajo pranon se përdorimi është kthyer në një veprim automatik. Gjatë një bisede me BBC News, ajo tregoi se kishte qëndruar në shtrat me vape-n në njërën dorë, ndërsa me tjetrën lëvizte në Instagram, pa e kuptuar se po e përdorte vazhdimisht.

Mjekja e përgjithshme Helen Wall thotë se te pacientët vëren shpesh një lloj varësie psikologjike, ku përdorimi i cigareve elektronike shërben si mënyrë për të rregulluar emocionet.

Një përvojë të ngjashme ka edhe Malin Andersson, aktiviste kundër dhunës në familje dhe ish-pjesëmarrëse në emisionin Love Island. Ajo nisi të përdorte vape gjatë një ndarjeje stresuese, kur kërkonte ngushëllim, dhe beson se pikërisht veprimi fizik i përdorimit e bëri të krijonte varësi.

Të dhënat e ONS-së tregojnë se grupmosha 25–34-vjeçare është ndër grupet që përdorin më së shumti cigare elektronike në Mbretërinë e Bashkuar. Sipas raportit, gati një në gjashtë persona të kësaj moshe mund t’i përdorë ato çdo ditë ose herë pas here.

Sinjali – aty ku e vërteta flet para lajmit!

/GazetaSinjali/