5 ditë më parë
Mediat serbe dhe zyrtarë politikë në Serbi kanë pretenduar se kryeministri i Kosovës, Albin Kurti, po financon mbështetjen për Listën Studentore në zgjedhjet parlamentare në Serbi. Megjithatë, në publikimet e shqyrtuara nuk paraqiten prova që vërtetojnë pretendimin për financim nga Kurti.
Pretendimi se Kurti po financon mbështetjen për Listën Studentore në Serbi është përsëritur në disa publikime mediatike dhe deklarata të aktorëve politikë serbë, në prag të zgjedhjeve parlamentare të 25 tetorit 2026.
Më 6 tetor, mediumi serb Novosti publikoi një artikull me titull “Kurti u bën thirrje të gjithëve të dalin dhe të votojnë për Listën Studentore!”, në të cilin pretendohej se Kurti, përmes Nenad Rashiqit, po e mbështeste këtë listë dhe u bënte thirrje qytetarëve të votonin për të.
Një pretendim i ngjashëm u publikua edhe nga mediumi tjetër serb Informer, i cili e lidhi mbështetjen e Rashiqit për Listën Studentore me kryeministrin e Kosovës, duke e paraqitur atë si ndërmjetësues të mbështetjes.
Në këto publikime nuk u paraqitën prova që do të dëshmonin se Kurti po e financonte mbështetjen për këtë listë (shih këtu artikullin e publikuar nga hibrid.info).
Më 9 tetor, pretendimi u përsërit nga Petar Petkoviq, drejtori i Zyrës për Kosovën në Qeverinë e Serbisë. Në një intervistë të transmetuar nga televizioni “Mačva”, e raportuar nga Novosti në artikullin “Kurti e mbështet Listën Studentore”, Petkoviq deklaroi se Kurti po e financonte mbështetjen për Listën Studentore.
Petkoviq e lidhi pretendimin me qëndrimin e Nenad Rashiqit, kryetar i partisë “Për Liri, Drejtësi dhe Mbijetesë”, i cili ka shprehur mbështetje për këtë listë. Ai pretendoi gjithashtu se pas kësaj mbështetjeje qëndrojnë shërbime të huaja, pa paraqitur prova për këto akuza.
Çka tregojnë faktet?
Më 24 shtator 2026, Nenad Rashiq deklaroi se partia e tij kishte vendosur ta mbështeste Listën Studentore “me të gjitha mjetet në dispozicion” në zgjedhjet parlamentare në Serbi.
Sipas raportimit të Radio Evropa e Lirë, Rashiq shpjegoi se partia do t’i mobilizonte mbështetësit për të marrë pjesë në votim dhe do të organizonte udhëtime të përbashkëta drejt qendrave të votimit.
Ai e arsyetoi këtë mbështetje me nevojën për ndryshimin e politikës së Beogradit zyrtar ndaj Kosovës.
Këto deklarata dëshmojnë se partia e Rashiqit ka shprehur publikisht mbështetje politike për Listën Studentore dhe ka paralajmëruar angazhim organizativ për të ndihmuar pjesëmarrjen në zgjedhje.
Megjithatë, deklarata për mbështetjen “me të gjitha mjetet në dispozicion” nuk dëshmon se financimi vjen nga Albin Kurti.
Në artikujt e Novosti dhe Informer, si dhe në deklaratën e Petkoviqit të raportuar nga Novosti, nuk paraqiten dokumente financiare, dëshmi për transferime parash apo prova të tjera që vërtetojnë se kryeministri i Kosovës po e financon këtë mbështetje.
Edhe raportimi i Radio Evropa e Lirë për qëndrimin e Rashiqit dokumenton mbështetjen politike dhe organizative të paralajmëruar nga partia e tij, por nuk dëshmon se kjo mbështetje financohet nga Kurti.
Si përsëritet pretendimi?
Publikimet e 6 tetorit nga Novosti dhe Informer e lidhën mbështetjen e Rašićit për Listën Studentore me përfshirjen e pretenduar të Kurtit. Më 9 tetor, Petkoviq e përsëriti akuzën për financim dhe e zgjeroi atë me pretendime për përfshirjen e shërbimeve të huaja dhe synime të pretenduara kundër shtetit serb.
Bazuar në burimet e shqyrtuara, pretendimi se Kurti po financon mbështetjen për Listën Studentore nuk mbështetet me prova në publikimet e përmendura. Faktet e dokumentuara dëshmojnë mbështetjen politike dhe angazhimin e paralajmëruar të partisë së Rashiqit, por jo financimin nga Kurti.
