20 orë më parë
Një letër e Komitetit Ndërkombëtar të Lojërave Mesdhetare (ICMG), e datës 15 tetor 2026, drejtuar kryeministrit të Kosovës, Albin Kurti, kryetarit të Prishtinës, Përparim Rama, dhe presidentit të Komitetit Olimpik të Kosovës, Ismet Krasniqi, trajton obligimet që lidhen me organizimin e Lojërave Mesdhetare Prishtina 2030.
Sipas letrës, ICMG-ja thotë se nuk ka marrë përgjigje ndaj një komunikimi të mëhershëm të datës 21 shtator 2026. Dokumenti përmend gjithashtu garancinë bankare ose të sigurimit, e cila duhej të dorëzohej që në janar 2026, por që, sipas ICMG-së, ende nuk ishte dorëzuar. Po ashtu, letra përmend taksat dhe tarifat e papaguara për muajin qershor 2026 (shih këtu).
Dokumenti i publikuar nga kryetari i Prishtinës, Përparim Rama
Në dokument, ICMG-ja i cilëson këto rrethana si tregues të vështirësive serioze në zbatimin e Kontratës së Qytetit Pritës (Host City Contract) dhe amendamentit të saj, si dhe në përmbushjen e obligimeve që rrjedhin prej tyre.
Letra njofton se çështja do të shqyrtohet në mbledhjen e Komitetit Ekzekutiv të ICMG-së më 19 dhjetor 2026. Sipas dokumentit, në këtë mbledhje parashihet të ratifikohet propozimi për thirrjen e një Asambleje të Jashtëzakonshme të Përgjithshme të anëtarëve të ICMG-së, e cila do të vendosë për të ardhmen e Lojërave Mesdhetare 2030.
Qëndrimi i Përparim Ramës
Pas publikimit të letrës, kryetari i Prishtinës, Përparim Rama, reagoi përmes llogarisë së tij zyrtare në Facebook me mesazhin: “Kosova në prag të humbjes së Lojërave Mesdhetare 2030!” (shih këtu).
Në postimin e tij, Rama tha se Komuna e Prishtinës kishte punuar në hartimin e masterplanit dhe në identifikimin e projekteve dhe lokacioneve, të cilat, sipas tij, ishin miratuar nga Kuvendi i Kryeqytetit. Ai shprehu shqetësimin se situata mund të rrezikojë organizimin e Lojërave dhe iu referua mungesës së përgjigjeve institucionale të përmendur në letrën e ICMG-së.
Rama gjithashtu iu referua datës 19 dhjetor, kur Komiteti Ekzekutiv i ICMG-së do ta shqyrtojë çështjen dhe propozimin për thirrjen e një Asambleje të Jashtëzakonshme, e cila do të vendosë për të ardhmen e Lojërave.
Qëndrimi i Blerim Gashanit
Më 15 tetor 2026, ministri i Sportit dhe Rinisë, Blerim Gashani, publikoi një reagim në faqen zyrtare të Ministrisë së Kulturës, Rinisë dhe Sportit (shih këtu).
Në reagimin e tij, Gashani tha se publikimi i korrespondencës pa pasqyruar tërësinë e komunikimeve dhe angazhimeve institucionale krijonte, sipas vlerësimit të tij, “alarm të pabazë”.
Ai theksoi se letra u ishte drejtuar përfaqësuesve përkatës institucionalë, përfshirë edhe kryetarin e Prishtinës. Gashani deklaroi se përkushtimi i Qeverisë për organizimin e Lojërave mbetet i plotë dhe se puna po vazhdon në bashkëpunim me ICMG-në, partnerët dhe institucionet përkatëse për përmbushjen e obligimeve.
Në reagimin e tij, ministri tha gjithashtu se Qeveria e Kosovës do të jetë garantuese e Lojërave dhe përfundoi me deklaratën: “Kosova do të organizojë Lojërat Mesdhetare 2030!” (shih këtu).
Çka dokumentojnë burimet zyrtare për përgatitjet?
Përgatitjet institucionale për Lojërat janë përmendur edhe në njoftimet e mëhershme zyrtare. Sipas njoftimit të Zyrës së Kryeministrit të 14 gushtit 2026, atë ditë u mbajt mbledhja e dytë e Komitetit Organizativ të Lojërave Mesdhetare Prishtina 2030 (shih këtu).
Në këtë mbledhje u diskutuan përgatitjet për prezantimin e raportit të progresit në Asamblenë e Përgjithshme të ICMG-së, më 20 gusht 2026. Njoftimi bën të ditur gjithashtu se Blerim Gashani u miratua si përfaqësues i Komitetit Organizativ për prezantimin e raportit.
Ndërkaq, Kontrata e Qytetit Pritës për Lojërat Mesdhetare Prishtina 2030 përcakton kornizën kontraktuale të organizimit dhe obligimet përkatëse. Letra e ICMG-së e 15 tetorit i referohet kësaj kontrate dhe amendamentit të saj në lidhje me çështjet e ngritura (shih këtu).
Çka mbetet për t’u sqaruar?
Në letrën e publikuar nuk jepen hollësi për arsyet pse garancia bankare ose e sigurimit, e kërkuar për janarin 2026, ende nuk ishte dorëzuar, apo pse kishin mbetur të papaguara taksat dhe tarifat për qershorin 2026.
Ndërkaq, ministri Blerim Gashani deklaroi se korrespondenca e publikuar nuk pasqyron të gjitha komunikimet dhe angazhimet institucionale, por në reagimin e tij nuk dha hollësi të mëtejshme për këto çështje. Për këtë arsye, nga burimet e cituara nuk mund të përcaktohen arsyet e mospërmbushjes së detyrimeve të përmendura nga ICMG-ja.
Përfundimi
Letra e ICMG-së e 15 tetorit 2026 ngre shqetësime për përmbushjen e detyrimeve që lidhen me organizimin e Lojërave Mesdhetare Prishtina 2030 dhe njofton për shqyrtimin e çështjes nga Komiteti Ekzekutiv më 19 dhjetor. Përparim Rama e paraqiti situatën si rrezik për organizimin e Lojërave, ndërsa Blerim Gashani deklaroi se angazhimi i Qeverisë për realizimin e tyre vazhdon.
Njoftimet zyrtare dokumentojnë mbajtjen e takimeve të Komitetit Organizativ dhe diskutimet për raportin e progresit, por burimet e cituara nuk përmbajnë tërësinë e komunikimeve ndërmjet ICMG-së dhe institucioneve të Kosovës. Letra e publikuar nuk përbën vendim përfundimtar për të ardhmen e Lojërave.
