3 ditë më parë
Mediumi rus “politnavigator.net” dhe ai serb “vaseljenska.net”, kanë publikuar artikuj duke pretenduar në titujt e tyre se Kosova po përgatitet për luftë ose përballje me Serbinë duke ndihmuar Ukrainën.
Në këta artikuj citohet ministri i Mbrojtjes i Kosovës, Ejup Maqedonci, i cili ka folur për televizionin ndërkombëtar polak TVP World. Megjithatë, titujt e mediave i paraqesin deklaratat e tij në një kontekst që krijon përshtypjen se ndihma për Ukrainën është pjesë e përgatitjeve për luftë me Serbinë.
Çka pretendohet nga këtu mediume?
Më 12 tetor 2026, mediumi rus “politnavigator.net” publikoi artikullin me titullin “Kosova po përgatitet për përballje me Serbinë duke ndihmuar Ukrainën – ministri i Mbrojtjes” (shih këtu).
Një ditë më vonë, më 13 tetor 2026, mediumi serb “vaseljenska.net” publikoi artikullin me titullin “Shqiptarët po përgatiten për luftë me Serbinë duke ndihmuar Ukrainën” (shih këtu).
Përmes këtyre titujve, mediat krijojnë përshtypjen se Maqedonci ka deklaruar se ndihma e Kosovës për Ukrainën është pjesë e përgatitjeve për luftë me Serbinë.
Çka ka thënë faktikisht Maqedonci?
Ministri i Mbrojtjes i Kosovës, Ejup Maqedonci, ka folur në emisionin Talking With TVP World, të transmetuar nga TVP World, kanali ndërkombëtar polak që transmeton në gjuhën angleze. Intervista mban titullin “Will Serbia invade Kosovo?” (A do ta pushtojë Serbia Kosovën?) (shih këtu).
Në intervistë, Maqedonci ka folur për përgatitjen e Kosovës për vetëmbrojtje, trajnimin e trupave dhe mbështetjen që vendi i ka ofruar Ukrainës.
Sipas citimit të publikuar nga ky medium, Maqedonci ka thënë se Kosova po përgatit, planifikon dhe trajnon trupat e saj që të jenë të gatshme për të mbrojtur territorin e vendit, për të mbështetur autoritetet civile dhe për të kontribuar në paqen dhe sigurinë në Evropë dhe në botë.
Duke folur për Ukrainën, ministri ka përmendur mbështetjen në trajnime dhe fusha të tjera, si dhe dy pakot e ndihmës ushtarake që Kosova ia ka ofruar këtij shteti, pavarësisht se Ukraina nuk e ka njohur pavarësinë e Kosovës.
Në këtë kontekst, ai ka sqaruar se këto veprime bëhen për ta përgatitur Kosovën për vetëmbrojtje.
Më tej, Maqedonci ka folur për sfidat bashkëkohore të sigurisë, duke përmendur teknologjitë e reja ushtarake, dronët, kërcënimet hibride dhe kërcënimet konvencionale që mund të vijnë nga fqinjët, veçanërisht nga Serbia.
Çka nuk shkon me titujt e artikujve të mediumeve ruse e serbe?
Së pari, ndryshohet kuptimi i deklaratës. Maqedonci flet për përgatitjen e Kosovës për vetëmbrojtje dhe për ndihmën që i është ofruar Ukrainës. Ndërkaq, titulli i “politnavigator.net” e paraqet këtë si përgatitje për përballje me Serbinë, duke i bashkuar dy çështjet në një përfundim që nuk shprehet në deklaratën e cituar.
Së dyti, titulli i mediumit serb “vaseljenska.net” e paraqet pretendimin në mënyrë edhe më alarmuese. Ky medium përdor formulimin “po përgatiten për luftë me Serbinë”, që krijon përshtypjen se Kosova po planifikon një konflikt të armatosur me këtë shtet. Megjithatë, Maqedonci ka folur për gatishmërinë mbrojtëse të Kosovës dhe për kërcënimet e mundshme të sigurisë.
Pra, ndihma për Ukrainën paraqitet si mjet për përgatitjen e një lufte me Serbinë. Në deklaratën e cituar nga “politnavigator.net”, Maqedonci e lidh ndihmën për Ukrainën me përgatitjen e Kosovës për vetëmbrojtje, por ai nuk deklaron se kjo ndihmë ka për qëllim përgatitjen për luftë kundër Serbisë.
Për këtë intervistë kanë raportuar edhe disa media në Kosovë, të cilat kanë pasqyruar deklaratat e Maqedoncit për kërcënimet e sigurisë dhe përgatitjen mbrojtëse të vendit. Në deklaratat e tij nuk thuhet se Kosova po e ndihmon Ukrainën me qëllim që të përgatitet për luftë me Serbinë (shih këtu dhe këtu).
Analiza
Titujt e artikujve të publikuar nga mediumet ruse e serbe e paraqesin deklaratën e Ejup Maqedoncit jashtë kontekstit të saj, duke e lidhur mbështetjen e Kosovës për Ukrainën me përgatitjet për luftë me Serbinë.
Deklarata e cituar nuk dëshmon se Kosova po e ndihmon Ukrainën me qëllim që të përgatitet për luftë me Serbinë. Maqedonci ka folur për vetëmbrojtjen e Kosovës, zhvillimin e kapaciteteve mbrojtëse dhe përballimin e kërcënimeve të mundshme të sigurisë. Por, në asnjë rast ai nuk ka thënë se ndihma për Ukrainën ka për qëllim përgatitjen për luftë kundër Serbisë.
Bazuar në metodologjinë e punës, hibrid.info i vlerëson këta artikuj si “Dezinformatë”.
Arsyetimi
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
