Kroacia i vendosi tetë kushte Malit të Zi, anëtarësimi në BE në pikëpyetje

Mali i Zi ka ndërmarrë hapa për të zgjidhur mosmarrëveshjet me Kroacinë, të cilat mund të pengojnë synimin e Podgoricës për t’u bërë anëtari i 28-të i Bashkimit Evropian deri në vitin 2028.

Javën e kaluar, Zagrebi paraqiti një listë me tetë çështje që kërkon të zgjidhen para anëtarësimit të Malit të Zi.

Shumica lidhen me luftërat e viteve 1990 në ish-Jugosllavi, shkruan euronews.

Kryeministri kroat Andrej Plenkoviq deklaroi se, pavarësisht përpjekjeve të Kroacisë, gjatë dy viteve të fundit nuk është shënuar përparim në zgjidhjen e këtyre çështjeve.

Në përgjigje, parlamenti malazez miratoi ligje që synojnë mbrojtjen e monumenteve historike dhe heqjen e emrave të personave të vdekur më pak se 40 vjet më parë. Këto masa lidhen me kërkesat e Kroacisë për një pllakë përkujtimore kushtuar viktimave të kampit të Morinjit dhe emrin e një pishine në Kotor.

Zagrebi kërkon gjithashtu ndihmë për gjetjen e eshtrave të 14 viktimave të luftërave jugosllave, si dhe kompensim për familjet kroate të privuara nga pronat e tyre. Edhe kufiri detar mes dy vendeve mbetet i pazgjidhur.

Kroacia i konsideron hapat e Malit të Zi një fillim pozitiv, por kërkon që masat të zbatohen plotësisht para ratifikimit të marrëveshjes së anëtarësimit.

Ndërkohë, Gjermania po i bën thirrje Zagrebit që të mos lejojë që mosmarrëveshjet dypalëshe të pengojnë zgjerimin e BE-së.

“Mali i Zi i ka përmbushur të gjitha kërkesat. Kanë mbetur disa çështje të vogla dypalëshe, por të gjitha mund të zgjidhen”, deklaroi kancelari gjerman Friedrich Merz.

Berlini druhet se bllokimi i procesit për shkak të konflikteve dypalëshe mund të krijojë precedent për vendet e tjera që synojnë anëtarësimin në Bashkimin Evropian. /Telegrafi/