1 orë më parë
Këshilltarja e qeverisë së Kantonit të Cyrihut, Natalie Rickli, nga Partia Popullore Zvicerane (SVP), ka tërhequr kandidaturën e saj për Këshillin Federal të Zvicrës. Politikania e njohur, e lindur në Winterthur, synon të kandidojë sërish në zgjedhjet e qeverisë kantonale në prill të vitit 2027.
“Si kantoni më i madh, Kantoni i Cyrihut ka nevojë për një qeveri të qëndrueshme në këto kohë sfiduese”, shkroi Rickli në llogarinë e saj në Instagram, raporton SRF.
Ajo theksoi se dëshiron të vazhdojë të përmbushë përgjegjësitë e saj në Kantonin e Cyrihut, duke shprehur kënaqësinë për detyrën që ushtron dhe vullnetin për të vazhduar punën me motivim e përkushtim për qytetarët e kantonit.
Për këtë arsye, Rickli ka vendosur të vazhdojë punën në qeverinë kantonale, megjithëse e konsideron të rëndësishëm dhe të arsyeshëm përfaqësimin e Cyrihut në Këshillin Federal.
Rickli është anëtare e qeverisë kantonale të Cyrihut dhe drejtuese e Departamentit të Shëndetësisë që nga maji i vitit 2019. Në pranverë, ajo kishte njoftuar se do të kandidonte në zgjedhjet kantonale të vitit të ardhshëm dhe se nuk do të ishte e disponueshme për një kandidaturë në Këshillin e Shteteve të Parlamentit zviceran, transmeton Telegrafi.
Ajo është një nga politikanet më të njohura të SVP-së në vend dhe ka përvojë shumëvjeçare parlamentare e ekzekutive, përfshirë periudhën si anëtare e Këshillit Kombëtar. Gjatë pandemisë së Covid-19, ajo pati edhe kundërshtime brenda partisë së saj.
Rickli ishte përmendur si një pasardhëse e mundshme e presidentit federal Guy Parmelin, i cili në fillim të tetorit njoftoi dorëheqjen pas njëmbëdhjetë vjetësh në Këshillin Federal, duke deklaruar se dëshiron t'u hapë rrugë fytyrave të reja në kohë të pasigurta.
Pas tërheqjes së saj, në garë për ta pasuar Parmelinin mbetet këshilltarja kombëtare e Gjenevës, Céline Amaudruz. Ndërkohë, si kandidat është paraqitur edhe këshilltari kombëtar Thomas Matter nga Kantoni i Cyrihut./Telegrafi/
