1 orë më parë
Elon Musk ka deklaruar se do t'i japë çdo fëmije në Amerikë një pjesë në SpaceX, kompaninë e tij të hapësirës ajrore dhe inteligjencës artificiale me vlerë 2 trilionë dollarë, në një kohë kur kompanitë teknologjike përballen me një shqyrtim gjithnjë e më të rreptë lidhur me ndikimin e tyre në shoqëri.
“Vitine ardhshëm, do t'i jap një nga aksionet e mia të SpaceX çdo fëmije në Amerikë”, shkroi ai në platformën X të hënën. “Ky do të jetë i pari nga shumë të tjerë”.
SpaceX filloi të tregtohej publikisht vetëm në qershor (dhe realizoi ofertën më të madhe publike fillestare në histori).
Aksionet e kompanisë tregtoheshin me rreth 146 dollarë në mbyllje të tregut të premten.
Por propozimi i Musk-ut ishte i varfër në detaje, shkruan CNN, përcjell Telegrafi.
Nuk është e qartë se si do të shpërndaheshin këto aksione te dhjetëra miliona fëmijë amerikanë, apo nëse të gjithë ata do të kishin të drejtë t'i përfitonin.
Sipas Byrosë së Regjistrimit të Popullsisë në Shtetet e Bashkuara, ka përafërsisht 73 milionë persona nën moshën 18 vjeç; kjo do të thotë se dhurata e mundshme e Musk-ut do të kishte një vlerë prej rreth 10.7 miliardë dollarësh, bazuar në çmimin aktual të aksioneve të SpaceX.
Ofrimi i një pjese në tregun e aksioneve të SHBA-së për të rinjtë nuk është një ide e re.
Këtë muaj, Departamenti i Thesarit regjistroi automatikisht miliona persona nën moshën 18 vjeç në “Llogaritë Trump” (Trump Accounts) — një mekanizëm i ri federal për kursime dhe investime — ku fëmijët e lindur midis fillimit të vitit 2025 dhe fundit të vitit 2028 kanë të drejtë të përfitojnë një kontribut të vetëm nga qeveria në vlerën 1,000 dollarë.
Përpjekje për të zbutur dëmin?
Oferta e Musk-ut erdhi si përgjigje ndaj njoftimit të kompanisë Anthropic të dielën, se ajo do të dedikojë të paktën 5% të aksioneve të saj — me vlerë 48 miliardë dollarë sipas vlerësimit më të fundit të kësaj kompanie private — për një “Fond për të Mirën Publike”, i cili do të dhurojë fonde për kauza shoqërore.
Ky fond mund të ofrojë “donacione të mëdha” për organizata jofitimprurëse ose të kryejë “shpërndarje të drejtpërdrejta për grupe specifike të popullsisë”, shkroi kompania në faqen e saj të internetit, duke shtuar se këto fonde mund të ndihmojnë në zbutjen e ndikimit të inteligjencës artificiale në vendet e punës së njerëzve.
Musk u përgjigj në X: “Unë rekomandoj që aksionet t'u jepen drejtpërdrejt publikut... Kjo është ajo që do të bëj unë”.
Të dyja ofertat vijnë në një kohë kur kompanitë e inteligjencës artificiale përballen me reagime të forta mbi sigurinë e produkteve të tyre (vetë Anthropic paralajmëroi së fundmi për "rrezikun ekzistencial për njerëzimin" që paraqet teknologjia), potencialin që inteligjenca artificiale t'i shtyjë njerëzit të largohen nga vendet e tyre të punës në masë, si dhe ndikimin social dhe mjedisor të ndërtimit gjigant të qendrave të të dhënave në industri. /Telegrafi/
