1 orë më parë
Moti i vjeshtës do të përkeqësohet në Zvicër gjatë ditëve në vijim. Një front i ftohtë që po afrohet nga perëndimi do të sjellë reshje shiu, temperatura më të ulëta dhe borë në zonat malore, ndërsa fundjava pritet të jetë e lagësht dhe me erë.
Zvicra po përgatitet për një ndryshim të motit, pasi një front i ftohtë që vjen nga perëndimi do të ndikojë në kushtet atmosferike gjatë kësaj jave.
Sipas gazetës zvicerane Blick, java ka nisur me mjegull të dendur në ultësira, ndërsa në zonat më të larta moti është kryesisht me diell. Meteorologët paralajmërojnë se kjo situatë do të ndryshojë gradualisht, me shtim të vranësirave dhe reshjeve.
Të martën, vranësirat pritet të shtohen në perëndim të vendit, ndërsa reshjet do të përfshijnë veçanërisht rajonin e Tiçinos. Në veri të Alpeve temperaturat pritet të lëvizin nga 12 deri në 14 gradë Celsius, ndërsa në zonat ku fryn era e ngrohtë foehn mund të arrijnë deri në 20 gradë.
Të mërkurën, shiu do të përhapet në më shumë zona të vendit. Temperaturat pritet të zbresin në 10–12 gradë Celsius, ndërsa kufiri i reshjeve të borës do të ulet gjatë natës, duke arritur lokalisht rreth 1.200 metrave lartësi.
Sipas parashikimit të publikuar nga Blick, e enjtja pritet të jetë dita më me diell e javës në ultësirat e Rrafshnaltës Zvicerane. Megjithatë, drejt mbrëmjes pritet të rikthehen vranësirat nga perëndimi, shkruan Blick, tranmseton Telegrafi.
Nga e premtja dhe gjatë fundjavës, moti pritet të jetë i paqëndrueshëm, me reshje të herëpashershme dhe erë. Temperaturat parashikohen të lëvizin nga 10 deri në 13 gradë Celsius.
Meteorologët këshillojnë që planet për fundjavën të përshtaten me kushtet atmosferike, pasi aktivitetet në natyrë mund të vështirësohen nga shiu dhe era.
Ndryshimi i motit shënon një përforcim të kushteve tipike të vjeshtës në Zvicër, me më pak diell në ultësira, reshje më të shpeshta dhe mundësi për borë në lartësitë malore./Telegrafi/
