6 muaj më parë
Granit Xhaka është shpallur futbollisti më i mirë i vitit te Përfaqësuesja e Zvicrës, për herë të katërt rresht.
Xherdan Shaqiri ndërkohë e ka fituar çmimin e lojtarit më të mirë të Superligës së Zvicrës.
Të dyja këto çmime ishin për vitin 2025. Dhe u takuan futbollistëve shqiptarë.
Xhaka vazhdon të jetë kapiten dhe lider i Zvicrës, ndërsa po shkëlqen tani edhe te Sunderlandi në Premier League.
Shaqiri u pensionua nga përfaqësuesja “helvetike” pas përfundimit të Evropianit 2024, por vitin e kaluar e pati të jashtëzakonshëm te Baseli.
Çmim të premten fitoi edhe Valon Fazliu. Fazliu u shpall më i miri i kategorisë së dytë të Zvicrës.
Geraldine Reuteler e siguroi çmimin te futbollistet për vitin e dytë rresht.
Federata e Futbollit e Zvicrës njoftoi të premten për këto çmime. Ceremonia është dashur të mbahej më 12 janar, por për shkak të fatkeqësisë së 1 janarit në Crans-Montana, fituesve iu dhanë çmimet personalisht.
Xhaka shpallet më i miri në përfaqësuese për të katërtën herë radhazi.
“Si kapiten, 33-vjeçari e udhëhoqi Zvicrën në paraqitjen e gjashtë rresht në Kupë të Botës. Ai ka shfaqur kualitetet e liderit edhe në nivel klubesh. Pasi u kthye në Premier League nga Bayer Leverkuseni, menjëherë e mori shiritin e kapitenit te skuadra e promovuar, Sunderland”, ka shkruar “Bluewin” të premten.
