U pensionua 3 vite më parë, mesfushori spanjoll rikthehet në futboll

David Silva ka vendosur t’i rikthehet futbollit të luajtur, tre vjet pasi i dha fund karrierës profesionale.

Mesfushori spanjoll, tashmë 40-vjeçar, ka nënshkruar zyrtarisht me Supreme Sha Tin, skuadër që garon në kampionatin e Hong Kongut.

Ish-ylli i Manchester City-t ishte tërhequr nga futbolli në vitin 2023, pas një dëmtimi të rëndë në kohën kur ishte pjesë e Real Sociedadit.

Tani, Silva ka vendosur të rikthehet në fushë dhe do ta bëjë këtë në Azi. Klubi i ri ka njoftuar se spanjolli do të mbajë fanellën me numrin 21 dhe pritet t’i bashkohet së shpejti skuadrës në stërvitje.

Në një mesazh për tifozët, Silva ka shprehur entuziazmin për aventurën e re, duke thënë se mezi pret të njohë kulturën vendase dhe të përjetojë nga afër futbollin në Hong Kong.

Gjatë një karriere të jashtëzakonshme, Silva ka lënë gjurmë te Valencia, Manchester City dhe kombëtarja e Spanjës.

Me Cityn, ai u shndërrua në një prej figurave më të rëndësishme të historisë moderne të klubit, ndërsa me Spanjën fitoi Kupën e Botës në vitin 2010 dhe Kampionatin Evropian në vitin 2012.

Tani, në moshën 40-vjeçare, “El Mago” po përgatitet për një kapitull krejt të ri në karrierën e tij.

Sinjali – aty ku e vërteta flet para lajmit!

/GazetaSinjali/