1 orë më parë
Presidenti amerikan, Donald Trump, pretendon se ka të drejtë të kandidojë sërish për president, pavarësisht se Kushtetuta e Shteteve të Bashkuara ia ndalon një mandat të tretë.
Gjatë një tubimi në Sioux City, në shtetin e Iowa-s, Trumpi përsëriti pretendimet se demokratët ia vodhën fitoren në zgjedhjet presidenciale të vitit 2020, të cilat i humbi ndaj Joe Bidenit.
“Nuk e di kush do të jetë presidenti juaj i ardhshëm, por mendoj se ligji thotë se nuk mund të kandidoj sërish. E kam studiuar gjatë atë formulim”, u tha Trumpi mbështetësve të tij.
Megjithatë, ai këmbënguli se duhet të ketë të drejtë të kandidojë sërish, duke pretenduar se ka fituar tri zgjedhjet presidenciale në të cilat ka marrë pjesë.
“Na mashtruan në zgjedhjet e tjera. Ne kemi fituar tri herë. Mendoj se kam të drejtë të kandidoj sërish, sepse ata mashtruan”, deklaroi presidenti amerikan.
Trumpi fitoi zgjedhjet presidenciale në vitet 2016 dhe 2024, ndërsa në vitin 2020 u mposht nga demokrati Joe Biden. Pretendimet e tij për manipulim të zgjedhjeve të vitit 2020 nuk janë mbështetur me prova dhe nuk e ndryshuan rezultatin zyrtar.
Presidenti amerikan ka folur edhe më herët për mundësinë e një mandati të tretë, ndonëse ka pranuar se Kushtetuta e ndalon një gjë të tillë.
Amendamenti i 22-të i Kushtetutës amerikane përcakton se asnjë person nuk mund të zgjidhet president më shumë se dy herë. Trumpi shërbeu si president nga viti 2017 deri në vitin 2021 dhe u rikthye në Shtëpinë e Bardhë në janar të vitit 2025.
Sipas dispozitave aktuale kushtetuese, ai nuk mund të zgjidhet president për një mandat tjetër në vitin 2028. Për të ndryshuar këtë kufizim do të nevojitej një proces i vështirë kushtetues, që kërkon mbështetjen e dy të tretave të të dyja dhomave të Kongresit dhe ratifikimin nga tri të katërtat e shteteve amerikane. /Telegrafi/
