47 minuta më parë
Trump pezullon sanksionet ndaj Rusisë, rriten tensionet me Ukrainën
Vendimi është shpallur përmes një urdhri ekzekutiv të premten, ndërsa administrata amerikane po ushtron presion ndaj Ukrainës që të ndalojë sulmet ndaj objekteve ruse të naftës, në përpjekje për të ulur çmimet e karburanteve përpara zgjedhjeve të mesmandatit në SHBA.
Sipas CNN-it, Ukraina fillimisht e pranoi përkohësisht kërkesën, por më pas i rifilloi sulmet, ndërsa Rusia ka vazhduar të godasë infrastrukturën energjetike ukrainase.
Presidenti ukrainas, Volodymyr Zelensky, e ka dënuar vendimin amerikan, i cili erdhi në kohën kur Rusia kishte kryer atë që ai e cilësoi si një nga sulmet më të mëdha ndaj sektorit energjetik të Ukrainës.
“Në një kohë kur rusët kanë kryer një sulm kaq masiv ndaj sektorit tonë energjetik, fatkeqësisht në Amerikë u mor një vendim për ta shpërfillur plotësisht Ligjin Lindsey Graham, i cili duhej të ushtronte presion vërtet efektiv ndaj Rusisë për t’i dhënë fund kësaj lufte”, deklaroi Zelensky.
Sanksionet e pezulluara parashihnin vendosjen e tarifave deri në 100 për qind, ndër të tjera, ndaj mallrave të importuara në SHBA nga pesë importuesit më të mëdhenj të naftës bruto ose gazit rus.
Trump e ka arsyetuar vendimin me interesin kombëtar të Shteteve të Bashkuara.
“I kam dorëzuar Kongresit një certifikim se dhënia e një përjashtimi të tillë në këtë moment është në interesin kombëtar të Shteteve të Bashkuara”, thuhet në urdhrin e publikuar nga Shtëpia e Bardhë.
Megjithatë, sipas CNN-it, urdhri nuk specifikon pse ky vendim i shërben interesit kombëtar dhe përcakton se përjashtimi do të mbetet në fuqi derisa administrata Trump të vendosë për veprime të mëtejshme.
Vendimi ka shkaktuar reagime nga ligjvënësit amerikanë të të dyja partive.
Senatorja demokrate Elizabeth Warren e ka cilësuar si një dështim të udhëheqjes, ndërsa përfaqësuesi republikan Don Bacon ka deklaruar se Trump “po e zgjat luftën, jo po i jep fund asaj”.
Ndërkohë, Kirill Dmitriev, kreu i fondit sovran të pasurisë së Rusisë, e ka përshëndetur vendimin, duke e cilësuar si “një moment të rëndësishëm dhe vërtet historik”.
Përkeqësohen marrëdhëniet mes SHBA-së dhe Ukrainës
Sipas CNN-it, vendimi për pezullimin e sanksioneve vjen pas një jave të tensionuar në marrëdhëniet mes SHBA-së dhe Ukrainës.
Trump kishte arritur javën e kaluar një marrëveshje që lejon eksportet e naftës dizel ruse, për të cilën Zelensky kishte deklaruar se ishte ndier i tradhtuar.
Marrëdhëniet mes dy vendeve janë tensionuar gjithashtu për shkak të ndërprerjes së dukshme të shkëmbimit të informacioneve të inteligjencës amerikane dhe kufizimeve ndaj shërbimit të internetit satelitor Starlink.
Autoritetet ukrainase kanë deklaruar se kufizimet ndaj versionit ushtarak të Starlink-ut kanë ndikuar në operacionet me dronë, sistemet e paralajmërimit të hershëm dhe komunikimet ushtarake.
Zelensky ka bërë të ditur se funksionimi i Starlink-ut është përmirësuar, por ende nuk është rikthyer plotësisht.
Ndërkohë, sipas raportimit të CNN-it, Kievit i janë mbaruar raketat interceptuese për sistemin amerikan të mbrojtjes ajrore Patriot, në kohën kur Rusia vazhdon sulmet ndaj infrastrukturës energjetike ukrainase.
Në anën tjetër, udhëheqësit e Bashkimit Evropian kanë bërë të ditur se po përgatisin paketën e 22-të të sanksioneve kundër Rusisë që nga fillimi i pushtimit në shkallë të plotë të Ukrainës.
Ata kanë theksuar se sanksionet ndaj Moskës do të forcohen nëse presidenti rus, Vladimir Putin, nuk e ndal luftën.
Burimi: CNN
