Trajneri i Irlandës pas humbjes: Fitore e merituar për Kosovën, mund të shënonin edhe më shumë

Përzgjedhësi i Irlandës, Heimir Hallgrimsson, e ka vlerësuar si të merituar fitoren 1-0 të Kosovës në ndeshjen e Ligës së Kombeve.

Në një deklaratë për “Klan Kosova” pas ndeshjes, Hallgrimsson tha se “Dardanët” ishin më të mirë dhe krijuan mundësi për të shënuar edhe më shumë gola.

“Fitore e merituar për Kosovën, ishin më të mirë se ne. Kishin disa shanse për të shënuar më shumë gola, por po shpresonim të mos pësonim. Ishte e merituar”, deklaroi ai.

Trajneri irlandez vlerësoi edhe paraqitjen dhe atmosferën në stadiumin “Fadil Vokrri”, duke pranuar se ekipi i tij nuk tregoi të njëjtën energji në fushë.

“Gjithçka bënë të mirë. Kishte lëvizje të mirë, atmosferë e shkëlqyer. Nuk e dhamë të njëjtën energji”, tha Hallgrimsson.

Ai shtoi se Irlanda do të vazhdojë të synojë fitimin e grupit, pavarësisht humbjes në ndeshjen e parë.

Sinjali – aty ku e vërteta flet para lajmit!

/GazetaSinjali/