Tragjedi në futboll: 24-vjeçari humb jetën pasi u godit nga rrufeja gjatë ndeshjes

Një futbollist 24-vjeçar ka humbur jetën pasi u godit nga rrufeja gjatë një ndeshjeje miqësore në Tajlandë.

Viktima është identifikuar si Safwan Awae, i cili po luante në një takim mes dy skuadrave të ligës së tretë nga Tajlanda dhe Malajzia. Ngjarja ndodhi më 4 gusht në stadiumin Santiphap, në kushte të motit të rënduar nga shirat e sezonit musonik.

Pamjet e publikuara tregojnë momentin kur rrufeja godet futbollistin, i cili rrëzohet menjëherë pa ndjenja në fushë.

Stafi mjekësor ndërhyri menjëherë dhe tentoi ta rikthente në jetë me reanimim (CPR), por 24-vjeçari ndërroi jetë pak pasi mbërriti në spital, si pasojë e lëndimeve dhe djegieve të rënda.

Përveç tij, edhe 12 futbollistë të tjerë pësuan djegie dhe lëndime të ndryshme. Ata u transportuan në spital, ku morën trajtim mjekësor.

Sipas protokolleve të FIFA-s dhe UEFA-s, ndeshjet duhet të ndërpriten dhe fusha të evakuohet kur konstatohet aktivitet i rrufeve në afërsi, por në këtë rast tragjedia nuk arriti të parandalohej.

Sinjali – aty ku e vërteta flet para lajmit!

/GazetaSinjali/