2 javë më parë
Publikohet një përmbajtje me mbishkrimin “Kryeministri Kurti zbulon emrin e kandidatit për President”.
Përmbajtja është publikuar të mërkurën (30 shtator) në Facebook, nga faqet me emrat “Gazeta Minuti” (këtu) dhe “Gazetavip.com” (këtu).
Çka nuk shkon me titullin?
Titulli është çorientues, pasi paraqet Bekim Sejdiun, i cili ishte tërhequr nga kandidatura, si një kandidat të ri për President të zbuluar nga kryeministri Albin Kurti.
Në kontekstin kur vendi ndodhet brenda afatit kushtetues për zgjedhjen e Presidentit, formulimi i titullit “Kryeministri Kurti zbulon emrin e kandidatit për President” (shih këtu dhe këtu), mund të krijojë përshtypjen se bëhet fjalë për një emër të ri të propozuar nga Kryeministri Albin Kurti në kuadër të procesit aktual për zgjedhjen e Presidentit.
Të dy këto përmbajtje kanë të bashkangjitur një vegëz, që përmban artikullin e raportimit të pretendimit të paraqitur në postime (shih këtu dhe këtu).
Në përmbajtje raportohet se kryeministri Albin Kurti ka thënë se Lëvizja Vetëvendosje (LVV) e ka ende Bekim Sejdiun si kandidat për President, duke iu referuar marrëveshjes së mëhershme me Lidhjen Demokratike të Kosovës (LDK-në). Në tekste shkruan se Kurti tha: “Sa i përket kandidatit, ne e kemi kandidatin. Kandidati është profesor Bekim Sejdiu nga marrëveshja”.
Në artikull sqarohet gjithashtu se Bekim Sejdiu ishte tërhequr nga kandidatura më 14 shtator. Kurti e lidhi tërheqjen e tij me zhvillimet rreth marrëveshjes me LDK-në, duke thënë: “Pra, prof. Bekim Sejdiu është tërhequr kur marrëveshjen e kanë shkelur e braktisur gjashtë deputetë të Lidhjes Demokratike të Kosovës.” Sipas Kurtit, tërheqja e Sejdiut ishte e lidhur me situatën e krijuar pas moszbatimit të marrëveshjes.
Më tej, artikulli thekson se Kurti tha se, nga këndvështrimi i LVV-së, marrëveshja politike vazhdon të jetë e vlefshme dhe duhet respektuar: “nga pikëpamja e Lëvizjes Vetëvendosje, ne kemi marrë veshje politike dhe unë besoj që duhet ta respektojmë atë”.
Por, në fund, Kurti theksoi se LVV nuk ka një emër të ri për kandidat, duke deklaruar: “Nuk kemi emër të ri ose tjetër. Nëse ky do të jetë rasti në të ardhmen, natyrisht që do të njoftoheni”.
Pra, nga vetë përmbajtja del se Kurti nuk ka njoftuar për një kandidat të ri. Ai ka përsëritur se LVV ende e konsideron Sejdiun kandidat në bazë të marrëveshjes, pavarësisht se Sejdiu ishte tërhequr më herët nga kandidatura.
Hibrid.info ka hulumtuar tutje për të konfirmuar edhe raportimet në brendësi të të dy artikujve. Sipas artikullit të “Radio Evropa e Lirë”, të publikuar më 30 shtator, konfirmohet se Kurti ka deklaruar se Bekim Sejdiu mbetet kandidati i LVV-së për President, pavarësisht tërheqjes së tij nga gara.
Radio Evropa e Lirë gjithashtu sqaron se LVV dhe LDK e kishin propozuar Sejdiun si kandidat të përbashkët më 31 gusht, ndërsa gjashtë deputetë të LDK-së u shprehën kundër kandidaturës së tij një ditë më vonë. Më 14 shtator, Sejdiu njoftoi tërheqjen nga gara, duke përmendur mungesën e mbështetjes së nevojshme parlamentare dhe përplasjet e brendshme politike.
Sipas REL-it, Kurti e interpretoi tërheqjen e Sejdiut si të kushtëzuar nga moszbatimi i marrëveshjes me LDK-në.
Megjithatë, REL thekson faktin se Kurti nuk sqaroi nëse kishte biseduar me Sejdiun për një rikthim të mundshëm në garë apo nëse Sejdiu ishte i gatshëm të kandidonte sërish. Madje, REL raporton se e kishte kontaktuar Sejdiun për ta pyetur nëse ishte i gatshëm të rikthehej në garë dhe ishte në pritje të përgjigjes.
Kjo do të thotë se në titujt e lartpërmendur, Bekim Sejdiu, i cili ishte tërhequr nga kandidatura, është paraqitur si një kandidat i ri për President, i zbuluar nga kryeministri Albin Kurti.
Analiza
Titulli se kryeministri Albin Kurti ka “zbuluar” një kandidat të ri për President është çorientues.
Në brendësi të artikujve raportohet se Kurti ka thënë se LVV-ja ende e konsideron Bekim Sejdiun kandidat për President, bazuar në marrëveshjen e mëhershme me LDK-në.
Megjithatë, Sejdiu ishte tërhequr nga kandidatura më 14 shtator, ndërsa Kurti ka theksuar se LVV-ja nuk ka ndonjë emër të ri.
Andaj, formulimi “Kryeministri Kurti zbulon emrin e kandidatit për President” krijon përshtypjen se bëhet fjalë për një emër të ri të bërë publik në kuadër të procesit aktual, ndërsa në fakt bëhet fjalë për një kandidat të mëhershëm, i cili ishte tërhequr nga kandidatura.
Bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
