Sonte rikthehet Superliga e Basketbollit, Rahoveci dhe Trepça përballen në xhiron e parë

Superliga e Kosovës në basketboll nis sot me një përballje interesante mes Rahovecit 029 dhe Trepçës, në kuadër të xhiros së parë të sezonit të ri.

Ndeshja do të zhvillohet sot, e shtunë, më 19 shtator, nga ora 19:00, në palestrën sportive “Mizahir Isma” në Rahovec.

Rahoveci 029 e nis sezonin me ambicie të reja, pas një edicioni të kaluar në të cilin siguroi mbijetesën vetëm në xhiron e fundit. Klubi ka punuar gjatë verës në ndërtimin e një skuadre më konkurruese, me synimin për të pasur paraqitje më të mirë në sezonin e ri.

Përballë tyre do të jetë Trepça, kampionia aktuale e Kosovës, e cila në Rahovec udhëton me objektivin për ta nisur me fitore mbrojtjen e titullit.

“Xehetarët” janë përforcuar gjatë afatit kalimtar veror dhe synojnë ta përsërisin suksesin e sezonit të kaluar, ndërsa atmosfera në palestrën “Mizahir Isma” pritet të jetë një prej elementeve që do t’i japë ngjyrë kësaj sfide.

Për Trepçën, sezoni i ri nuk do të jetë i fokusuar vetëm në garat vendore. Skuadra nga Mitrovica do të marrë pjesë edhe në FIBA Europe Cup, duke pasur një kalendar më të ngjeshur dhe angazhime në arenën ndërkombëtare.

Kështu, përballja në Rahovec i gjen të dyja skuadrat me objektiva të ndryshme, por me të njëjtin synim për ta nisur sezonin e ri në mënyrën më të mirë të mundshme.

Sinjali – aty ku e vërteta flet para lajmit!

/GazetaSinjali/