Shqipëria ia “rrëmben” Kosovës një lojtar, grumbullohet me U-21

Kombëtarja e Shqipërisë U-21 do të vijojë përgatitjet për Kampionatin Evropian U-21, “EURO 2027”, me një tjetër ndeshje miqësore.

Kuqezinjtë e drejtuar nga Alban Bushi do të përballen me Ukrainën U-21 më 5 tetor, në stadiumin “Szentmarjay Tibor Városi Stadion”, në Eger të Hungarisë, me fillim nga ora 15:30.

Grumbullimi i skuadrës do të nisë më 28 shtator në Tiranë, ndërsa trajneri Alban Bushi ka publikuar listën me 21 lojtarët e ftuar për këtë ndeshje.

Lista sjell edhe katër risi, ndërsa dy prej tyre vijnë nga Kombëtarja U-19.

Për herë të parë me Kombëtaren U-21 janë grumbulluar Mattia Huqi dhe Gabriel Kulla.

Ndërkohë, mbrojtësi Numan Ajetovikj, futbollist i Egnatias, dhe futbollisti i Malishevës, Omer Bajraktari, i cili më parë luante me grupmoshat e Kosovës, kanë zgjedhur të përfaqësojnë Shqipërinë.

Ndeshja ndaj Ukrainës është pjesë e programit të përgatitjeve të Kombëtares U-21 për Kampionatin Evropian U-21 2027.

Shqipëria U-21 do të jetë pjesë e turneut final si një nga vendet organizatore, së bashku me Serbinë.

Sinjali – aty ku e vërteta flet para lajmit!

/GazetaSinjali/