SHBA godet një anije të dyshuar për trafik droge në Karaibe, vriten katër persona

Ushtria amerikane ka kryer një sulm ndaj një anijeje të dyshuar për trafik droge në Detin e Karaibeve, duke vrarë katër persona, njoftoi të dielën Komanda Jugore e SHBA-së (SOUTHCOM).

Sipas deklaratës së SOUTHCOM, Task-Forca e Përbashkët për Hemisferën Perëndimore kreu një “sulm kinetik vdekjeprurës” ndaj një anijeje me shpejtësi të lartë, e cila po lëvizte përgjatë rrugëve të njohura të trafikut të drogës në Karaibe.

Komanda amerikane tha se kishte marrë informacione të konfirmuara se anija ishte e përfshirë në mënyrë aktive në trafikimin e narkotikëve.

Katër personat e vrarë gjatë operacionit u cilësuan nga SOUTHCOM si “narko-terroristë”, transmeton Telegrafi.

Ushtria amerikane publikoi gjithashtu pamje nga operacioni, ku shihet anija duke lundruar në det para se të goditej dhe të përfshihej nga një shpërthim.

SOUTHCOM nuk dha detaje të tjera mbi identitetin e personave të vrarë apo llojin e ngarkesës që dyshohet se transportonte anija. /Telegrafi/