Reali mund të përdorë strategjinë e dikurshme për ta ndihmuar Mbappen të fitojë Topin e Artë 2026

Kylian Mbappe mund të përfitojë nga një strategji që Real Madridi e ka përdorur edhe më parë për të ndihmuar lojtarët e tij të fitojnë Topin e Artë. Klubi madrilen mund të mobilizojë figura të njohura për të mbështetur publikisht kandidaturën e yllit francez për çmimin prestigjioz.

Sipas raportimeve të gazetës franceze “L’Equipe”, Mbappe është një nga favoritët për Topin e Artë 2026, pas një sezoni të jashtëzakonshëm në aspektin individual. Megjithatë, konkurrenca mbetet e fortë, me Lamine Yamal të Barcelonës, Harry Kane dhe emra të tjerë të rëndësishëm në garë.

Gazeta franceze thekson se Reali ka përdorur edhe më parë figura me ndikim, të lidhura me klubin, për të forcuar kandidaturën e lojtarëve të tij në javët para ndarjes së çmimit.

Shembulli më i qartë është Cristiano Ronaldo në vitin 2013. Portugezi nuk kishte fituar ndonjë trofe madhor me Real Madridin, ndërsa Franck Ribery i Bayern Munichut vinte pas një sezoni historik, në të cilin kishte fituar Ligën e Kampionëve, Bundesligën dhe Kupën e Gjermanisë.

Megjithatë, disa prej figurave më të rëndësishme të klubit madrilen dolën publikisht në mbështetje të Ronaldos. Mes tyre ishin Alfredo Di Stefano, Emilio Butragueno, Carlo Ancelotti, Iker Casillas dhe Sergio Ramos.

Bayerni, në anën tjetër, nuk arriti të shfaqte të njëjtin nivel mbështetjeje të unifikuar për Riberyn. Për më tepër, edhe Arjen Robben konsiderohej kandidat i klubit gjerman për çmimin.

Në fund, Ronaldo triumfoi me 27.99 për qind të votave, duke lënë pas Lionel Messin me 24.72 për qind dhe Riberyn me 23.36 për qind.

Tani, Real Madridi mund të synojë të përsërisë të njëjtën qasje për Mbappen, duke shfrytëzuar ndikimin e figurave të njohura të klubit për të përforcuar kandidaturën e tij për Topin e Artë 2026.

Sinjali – aty ku e vërteta flet para lajmit!

/GazetaSinjali/