1 muaj më parë
Kryetari i Prishtinës, Përparim Rama, ka njoftuar se Kryeqyteti do të krijojë një ndërmarrje të re publike komunale për pastrimin, me synim përmirësimin e menaxhimit të mbeturinave në Prishtinë.
Rama ka thënë se sistemi aktual i Kompanisë Rajonale “Pastrimi”, e cila mbulon Prishtinën, Obiliqin, Fushë Kosovën, Lipjanin, Podujevën dhe Drenasin, nuk po arrin t’u përgjigjet më nevojave të kryeqytetit.
Sipas tij, që nga viti 2024 nuk është nënshkruar marrëveshja me KfW-në për një investim prej 74.1 milionë eurosh në sistemin e pastrimit dhe menaxhimit të mbeturinave.
Rama ka deklaruar se Kryeqyteti i ka përmbushur obligimet e tij dhe se procesi ka mbetur i bllokuar për shkak të mungesës së një nënshkrimi.
“Do ta krijojmë ndërmarrjen e re publike komunale të pastrimit të Kryeqytetit”, ka bërë të ditur Rama.
Ai ka theksuar se ndërmarrja e re do të krijojë kapacitete të dedikuara për Prishtinën, me synim një sistem më funksional, efikas dhe të qëndrueshëm të pastrimit.
Rama ka siguruar punëtorët e Kompanisë “Pastrimi” se askush nuk do të mbetet pa punë, duke thënë se ata do të jenë pjesë e sistemit të ri.
Sipas Ramës, në bazë të Ligjit për Kryeqytetin, për krijimin e ndërmarrjes së re nuk nevojitet pëlqimi i Qeverisë.
“Qytetarët nuk mund të presin dhe Prishtina nuk mund të mbahet peng”, ka shkruar Rama, duke shtuar se qëllimi është krijimi i kapaciteteve të nevojshme për një Prishtinë më të pastër. /Telegrafi/
