1 ditë më parë
Përmes një artikulli të publikuar më 15 tetor, mediumi në gjuhën serbe “Vaseljenska.net” pretendon se kryeministri i Kosovës, Albin Kurti, po e mbështet Listën Studentore në Serbi, duke iu referuar një videoje të deputetit të Kuvendit të Kosovës, Lazar Raduloviq.
Në video, Raduloviqi shihet me një bluzë në të cilën paraqitet numri 3, me të cilin Lista Studentore garon në zgjedhjet parlamentare në Serbi, të planifikuara për 25 tetor 2026.
Çka nuk shkon me pretendimin?
Videoja nuk dëshmon se Kurti e ka udhëzuar Raduloviqin të veshë këtë bluzë apo se veprimi i deputetit është koordinuar me kryeministrin e Kosovës.
Në artikullin me titull “Gjithçka është e qartë si dita: Mbështetja e Kurtit për Listën Studentore drejtpërdrejt nga parlamenti i shtetit të rremë të Kosovës!”, “Vaseljenska.net” e paraqet paraqitjen e Raduloviqit me bluzën me numrin 3 si dëshmi të mbështetjes së Kurtit për këtë listë.
Megjithatë, artikulli nuk paraqet deklaratë të Kurtit që konfirmon mbështetjen për Listën Studentore dhe as dëshmi që veprimi i Raduloviqit është bërë me kërkesë ose në koordinim me kryeministrin.
Po ashtu, ky medium në këtë artikull e cilëson Raduloviqin si “deputet të Kurtit”, duke krijuar përshtypjen se ai i përket Lëvizjes Vetëvendosje, të udhëhequr nga kryeministri Albin Kurti.
Në fakt, Raduloviq është deputet i Kuvendit të Kosovës nga partia “Për Liri, Drejtësi dhe Mbijetesë”, e udhëhequr nga Nenad Rashiq (shih këtu).
FAKTET
Lazar Raduloviqi është deputet i Kuvendit të Kosovës nga partia “Për Liri, Drejtësi dhe Mbijetesë” (SPO), e drejtuar nga Nenad Rashiq, ministër për Komunitete dhe Kthim në Qeverinë e Kosovës.
Më 24 shtator 2026, Rashiqi deklaroi publikisht se partia e tij kishte vendosur ta mbështeste Listën Studentore në zgjedhjet parlamentare në Serbi. Në një raportim të Radio Evropa e Lirë, të publikuar nga Euronews Serbia (shih këtu), ai tha se partia do t’i përdorte të gjitha kapacitetet në dispozicion për ta mbështetur listën dhe do t’i mobilizonte përkrahësit për të marrë pjesë në votim.
Rashiqi deklaroi gjithashtu se partia e tij do të organizonte udhëtime të përbashkëta drejt qendrave të votimit. Ai e arsyetoi mbështetjen me synimin për të ndryshuar politikën e Beogradit zyrtar ndaj Kosovës. Megjithatë, deklarata e tij nuk dëshmon se Albin Kurti e ka udhëzuar Raduloviqin të paraqitet me bluzën me numrin 3.
Përveç Nenad Rashiqit, mbështetje për Listën Studentore kanë shprehur edhe subjekte politike dhe organizata të komunitetit serb që veprojnë në Kosovë, përfshirë Aleancën e Kosovës (Kosovski savez), Forumin Kombëtar Serb nga Graçanica (Srpski nacionalni forum – Gračanica), Lëvizjen Popullore Serbe (Srpski narodni pokret), Iniciativën Qytetare “Veriu për të gjithë” (Građanska inicijativa „Sever za sve“), Këshillin Kombëtar Serb të Kosovës dhe Metohisë (Srpsko nacionalno veće Kosova i Metohije), si dhe partinë Demokracia Serbe (Srpska demokratija).
Këto mbështetje janë bërë publike në deklarata dhe njoftime të veçanta, të raportuara nga mediumet KoSSev dhe Radio Evropa e Lirë (shih këtu dhe këtu).
Pretendime të ngjashme janë trajtuar edhe më herët nga hibrid.info
Hibrid.info ka trajtuar më herët pretendimet e mediave serbe se Albin Kurti po financon mbështetjen për Listën Studentore në Serbi.
Në artikullin e publikuar më 9 tetor, “Pretendime pa fakte se Kurti po financon mbështetjen për Listën Studentore në Serbi” (shih këtu), hibrid.info shqyrtoi pretendimet e mediave “Novosti” dhe “Informer”, sipas të cilave Kurti po e mbështeste dhe financonte këtë listë përmes Nenad Rashiqit.
Në atë trajtim u konstatua se deklarata e Rashiqit dëshmonte mbështetjen e partisë së tij, por nuk përmbante pohime se financimi vinte nga Kurti. Po ashtu, publikimet e shqyrtuara nuk paraqisnin dokumente financiare apo prova të tjera që do ta vërtetonin pretendimin për financim nga kryeministri i Kosovës.
Më 12 tetor, hibrid.info trajtoi sërish këtë narrativë në artikullin “Narrativë e pabazë e mediave dhe zyrtarëve serbë se Kurti po financon mbështetjen për Listën Studentore” (shih këtu), duke shqyrtuar edhe pretendimet e drejtorit të Zyrës për Kosovën në Qeverinë e Serbisë, Petar Petkoviq.
Edhe në rastin e ri, “Vaseljenska” e lidh një veprim të Raduloviqit me Kurtin, pa paraqitur prova që do të vërtetonin se kryeministri e ka organizuar apo udhëzuar atë.
Bazuar në burimet e shqyrtuara, mbështetja e Nenad Rashiqit dhe e partisë së tij për Listën Studentore është e dokumentuar. Megjithatë, videoja e Lazar Raduloviqit, e vetme, nuk dëshmon pretendimin se Albin Kurti po e mbështet drejtpërdrejt këtë listë.
Analiza
Mediumi serb “Vaseljenska.net” pretendon se Albin Kurti po e mbështet Listën Studentore në Serbi, duke iu referuar një videoje të deputetit Lazar Raduloviq me bluzën me numrin 3, me të cilin Lista Studentore garon në zgjedhjet parlamentare në Serbi, të planifikuara për 25 tetor 2026.
Megjithatë, videoja nuk dëshmon se Kurti e ka udhëzuar apo koordinuar këtë veprim. Mbështetja e Nenad Rashiqit dhe e partisë së tij për këtë listë është publike, por mediumi i lartcekur nuk paraqet prova që ajo vjen nga Kurti.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
