3 javë më parë
Faqja “Mërgata me LDK-në” në Facebook ka publikuar një fotografi ku paraqiten kryeministri në detyrë i Kosovës, Albin Kurti, dhe presidenti i Serbisë, Aleksandar Vuçiq.
Nëpërmjet kësaj fotografie pretendohet se të dy ndodhen aktualisht në Armeni dhe se ky shtet i ka bashkuar në një takim të përshkruar si “vëllazëror”, i cili interpretohet nga postimi si i drejtuar kundër shtetit të Kosovës.
Çka nuk shkon me këtë pretendim?
Kurti po merr pjesë në Samitin e 8-të të Komunitetit Politik Evropian, në Jerevan të Armenisë. Mirëpo, në këtë samit nuk është edhe Vuçiq, siç pretendohet.
Po ashtu, fotografia mbi të cilën ngritët ky pretendim është e vjetër.
FAKTET
Në ueb-faqen zyrtare të Zyrës së Kryeministrit, më 3 maj, është publikuar njoftimi se Kurti ka udhëtuar për vizitë zyrtare në Armeni, ku do të marrë pjesë në Samitin e Komunitetit Politik Evropian (shih këtu).
Mirëpo, presidenti serb nuk merr pjesë në këtë Samit. Aty Serbia përfaqësohet nga kryeministri Gjuro Macut, bëhet e ditur në njoftimin në ueb-faqen zyrtare të Qeverisë së Serbisë (shih këtu).
Fotografia që është përdorur në publikimin nga faqja “Mërgata me LDK-në” nuk i përket kësaj ngjarjeje. Ajo është shkrepur më 4 maj 2022, gjatë darkës joformale në mes të Kurtit dhe Vuçiqit, dhe atëkohë të ngarkuarit të BE-së në dialogun Kosovë-Serbi, Mirosllav Lajçak (shih këtu).
Analiza
Në një fotografi të shpërndarë në Facebook pretendohet se Kurti dhe Vuçiq ndodhen së bashku në Armeni dhe se janë takuar në një kontekst “vëllazëror” kundër Kosovës.
Megjithatë, ky pretendim nuk qëndron. Kurti po merr pjesë në Samitin e 8-të të Komunitetit Politik Evropian në Jerevan, ndërsa Vuçiq nuk është pjesë e këtij samiti. Serbia përfaqësohet nga kryeministri i saj. Po ashtu, fotografia e përdorur nuk është aktuale dhe i përket një takimi të mëhershëm të vitit 2022 gjatë një darke joformale në kuadër të dialogut Kosovë-Serbi.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
