4 ditë më parë
Një llogari në Facebook në gjuhën serbe ka ripublikuar pretendimin se në një fotografi historike me ish-presidentin e Jugosllavisë, Josip Broz Tito, shfaqen baballarët e kryeministrit të Kosovës, Albin Kurti, dhe politikanit serb Ivica Daçiq.
Në postimin e publikuar pretendohet se në fotografi shihen Desimir Daçiq, babai i Ivica Daçiqit, dhe Zaim Kurti, babai i Albin Kurtit. Krahas fotografisë, autori shkruan: “Le të dihet edhe kjo”, duke shtuar se fotografia dëshmon se “kjo fatkeqësi e jona nuk ishte planifikuar paraprakisht”.
Megjithatë, ky pretendim është i pavërtetë dhe është verifikuar edhe më parë nga hibrid.info, në gusht të vitit 2025 (shih këtu).
Çka nuk shkon me këtë pretendim?
Verifikimi i kryer nga hibrid.info në vitin 2025 kishte vërtetuar se personat e paraqitur në fotografinë me Titon nuk janë baballarët e Albin Kurtit dhe Ivica Daçiqit, siç pretendohej në publikimet e mëhershme.
Sipas hulumtimit të hibrid.info, fotografia ishte publikuar që në vitin 2020 nga dramaturgu kosovar Jeton Neziraj, në grupin në Facebook “Albanian Vintage Photography, people, cities, culture and history”.
Në përshkrimin e fotografisë, Neziraj kishte shkruar se ajo ishte realizuar në Beograd, më 1952, dhe paraqiste Titon me një grup qytetarësh dhe aktivistësh politikë nga Kosova.
Përshkrimi i fotografisë së publikuar nga Neziraj:
Beograd, 1952 – Tito me një grup nga Kosova, qytetarë e aktivistë politik të asaj kohe, ndër ta edhe Didare Dukagjini, Xhavit Nimani, Alush Gashi e Rame Kapllan Nikçi (ky me veshje kombetare). Do t’ishte interesant nëse mundemi me i identifiku edhe të tjerët.
Përveç këtij fakti, hibrid.info ka hulumtuar tutje, duke vërtetuar se në krahun e djathtë të Titos në fotografi, ishte Xhavit Nimani (ish-Kryetar i Kryesisë së Krahinës Kosovës), e jo babai i Ivica Daçiqit, Desimir Daçiq, siç pretendohet nga llogaria e lartcekur.
Ndërsa, personi tjetër që pretendohet se është babai i Albin Kurtit, Zaimi, del të jetë Ramë Kapllan Nikçi, themelues dhe udhëheqës i Ansamblit Folklorik ‘Rugova’.
Pretendimi vazhdon të qarkullojë
Pavarësisht verifikimit të mëhershëm, pretendimi i njëjtë vazhdon të shfaqet në rrjetet sociale, tashmë edhe përmes një llogarie në gjuhën serbe.
Hibrid.info kishte gjetur se fotografia me identifikimin e rremë ishte publikuar në Facebook edhe në vitin 2023, nga një faqe në gjuhën shqipe, si dhe më 5 shkurt 2025, nga faqja në gjuhën serbe “TD portal”.
Analiza
Një llogari në Facebook në gjuhën serbe po ripublikon pretendimin e pavërtetë se në një fotografi me ish-presidentin jugosllav Josip Broz Tito shihen Desimir Daçiqi, babai i Ivica Daçiqit, dhe Zaim Kurti, babai i Albin Kurtit.
Pretendimi i njëjtë ishte verifikuar nga hibrid.info edhe në vitin 2025, kur u vërtetua se personat në fotografi janë Xhavit Nimani dhe Ramë Kapllan Nikçi, e jo baballarët e Kurtit dhe Daçiqit.
Bazuar në metodologjinë e punës, hibrid.info e vlerëson këtë përmbajtje si “Dezinformatë”.
Arsyetimi
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
