3 javë më parë
Publikohet një përmbajtje me mbishkrimin që pretendon se presidenti i Emirateve te Bashkuara Arabe (EBA), Mohamed bin Zayed Al Nahyan, ka deklaruar se nëse Vjosa Osmani fiton, do te kete bashkepunim te ngushtë dhe investime ne Kosovë, që mund të arrijnë deri në tre miliardë dollarë.
Përmbajtja më këtë pretendim është publikuar të dielën (3 maj) në Facebook nga një faqe me emrin “TV Prishtina”.
Çka nuk shkon me këtë përmbajtje?
Përmbajtja në fjalë paraqet një deklaratë të sajuar.
Hibrid.info verifikoi përmes motorit të kërkimit “Google”, duke përdorur fjalët kyçe “mohammed bin zayed al nahyan vjosa osmani”. Rezultatet e shtatë ditëve të fundit nuk nxorën asnjë raportim nga asnjë burim, që të përmendë një deklaratë apo lidhje të tillë mes këtyre dy figurave (shih këtu).
Rezultate nuk u shfaqën as pas kërkimit të këtij pretendimi në “Google” (shih këtu).
Një deklaratë e tillë çfarë pretendohet nuk është hasur as në llogarinë e presidentes Vjosa Osmani (shih këtu) në Facebook dhe as në llogarinë e presidentit Mohamed bin Zayed (shih këtu).
Në përgjithësi, rezultatet e kërkimit nxorën vetëm dy raste nga e kaluara ku përmenden bashkë Osmani dhe Bin Zayed. Rasti i parë lidhet me takimin e Vjosa Osmanit me presidentin Mohammed bin Zayed gjatë qëndrimit të saj në Emiratet e Bashkuara Arabe më 6 shkurt (shih këtu).
Ndërsa momenti i dytë ishte biseda telefonike që Vjosa Osmani (3 mars) kishte zhvilluar me Mohamed bin Zayed, pas sulmeve të Iranit që targetonin EBA (shih këtu).
Në asnjërin prej këtyre rasteve nuk është deklaruar pretendimi për bashkëpunim të ngushtë dhe investime deri në tre miliardë dollarë në Kosovë.
Analiza:
Pretendimi se Mohammed bin Zayed Al Nahyan ka deklaruar se, nëse Vjosa Osmani fiton, do të ketë bashkëpunim të ngushtë dhe investime në Kosovë deri në tre miliardë dollarë, nuk është i vërtetë.
Nuk ekziston asnjë dëshmi publike apo raportim nga burime relevante që konfirmon një deklaratë të tillë, çka tregon se ajo është e sajuar.
Andaj, bazuar në metodologjinë e punës, hibrid.info e vlerëson përmbajtjen si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
