Premtimi për rritjen e shtesave për fëmijë paraqitet si i realizuar

Disa faqe në Facebook kanë publikuar një përmbajtje me titullin “LAJM I MADH PËR PRINDËRIT! Rriten shtesat për fëmijët”.

Ky postim është publikuar nga faqet “Postjeri” dhe “Shkupi Online”, ndërsa vegëzat e artikullit çojnë në ueb-faqet “gazetafama.com” dhe “lajme.al”.

Çka nuk shkon me këtë përmbajtje?

Verifikimi i kryer nga hibrid.info tregon se në këto postime një premtim për të ardhmen paraqitet sikur të ishte një masë e realizuar.

Pas klikimit në vegëzat e publikuara në këto postime, bëhet e qartë se rritja e shtesave për fëmijët nuk ka ndodhur, por bëhet fjalë për një zotim të kryeministrit Albin Kurti për mandatin e ardhshëm.

FAKTET

Më 15 maj 2026, disa media raportuan se Kurti kishte premtuar që, në mandatin e ardhshëm, shtesat për fëmijët të rriteshin në 60 deri në 90 euro, ndërsa mbështetja për lehonat të arrinte deri në 500 euro në muaj (shih këtu dhe këtu).

Edhe në fjalimin e mbajtur më 13 shtator 2026 në Kuvendin e Kosovës, Kurti tha se shtesat për fëmijët “sot janë 30 deri në 45 euro” dhe se “në mandatin e ardhshëm do t’i dyfishojmë”. Ai sqaroi se kjo rritje do të nënkuptonte shtesa prej 60 dhe 90 eurosh, përkatësisht (shih këtu).

Pra, shtesat për fëmijët nuk janë rritur në 60 deri në 90 euro, siç pretendohet në postimet e faqeve të lartcekura. Bëhet fjalë për një zotim për mandatin e ardhshëm, i cili në këto postime mundohet të paraqitet si rritje e realizuar.

Analiza

Disa faqe në Facebook paraqesin rrejshëm si të realizuar rritjen e shtesave për fëmijët.

Pas verifikimit të fakteve u vërtetua se bëhet fjalë për një zotim të Albin Kurtit për mandatin e ardhshëm, ndërsa aktualisht shtesat janë 30 deri në 45 euro.

Bazuar në metodologjinë e punës, hibrid.info e vlerëson këtë përmbajtje si “Clickbait“.

Arsyetimi

“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.