Plagosja me armë në Miradi, QKUK: Pacienti u trajtua dhe u lëshua nën përcjelljen e Policisë

Një person është plagosur me armë zjarri në fshatin Miradi të Fushë Kosovës, ndërsa pas incidentit ka kërkuar ndihmë mjekësore në Qendrën Klinike Universitare të Kosovës (QKUK).

QKUK ka konfirmuar për Gazetën Sinjali se personi i plagosur është trajtuar në Emergjencë dhe, pas konsultave mjekësore, është lëshuar në përcjellje të Policisë.

Naser Syla, shef i Emergjencës në QKUK, ka bërë të ditur se pacienti ka marrë trajtimin e nevojshëm mjekësor.

“Një pacient me plagë nga arma e zjarrit është trajtu në QE dhe pas konsultave të kryera, është lëshu në përcjellje të policisë.”, tha ai.

Rastin për Gazetën Sinjali e ka konfirmuar edhe Policia e Kosovës, e cila ka bërë të ditur se rreth orës 15:30 ka pranuar informacion nga QKUK-ja se një person i plagosur me armë zjarri kishte kërkuar trajtim mjekësor.

Ndërkohë, Policia ka identifikuar personin e dyshuar për rastin, por ai ende nuk është arrestuar dhe ndodhet në arrati.

“Lidhur me rastin është identifikuar personi i dyshuar, i cili aktualisht ndodhet në arrati. Veprimet e mëtejshme po vazhdojnë në koordinim me Prokurorin e Shtetit.”, tha zëdhënësja e Policisë për rajonin e Prishtinës për Sinjalin.

Sinjali – aty ku e vërteta flet para lajmit!

/GazetaSinjali/