5 muaj më parë
Futboll
Sinjali.com
16 Maj 2026 16:58
Ish-mbrojtësi brazilian Cicinho ka ndarë një rrëfim tronditës për periudhën më të errët të jetës së tij, duke treguar se ka luftuar për vite me varësi të rëndë nga alkooli dhe duhani, edhe gjatë karrierës së tij si futbollist profesionist.
Në një intervistë për mediat italiane, 45-vjeçari tregoi se problemet e tij nisën që në moshë të re, kur u njoh për herë të parë me alkoolin në një festë. Sipas tij, varësia u përkeqësua me kalimin e viteve, deri në nivele ekstreme.
“Në Romë vendosa një rekord: pija deri në 70 birra në ditë dhe dy pako cigare,” ka deklaruar ai, duke pranuar se për një periudhë të gjatë arriti ta fshihte stilin e jetesës nga klubet ku luante, përfshirë edhe Real Madrid.
Cicinho ka rrëfyer gjithashtu se shpesh shkonte në stërvitje pa gjumë dhe ende nën efektin e alkoolit, por megjithatë arrinte të performonte në nivel të lartë në fushë, gjë që sipas tij e ka bërë varësinë edhe më të vështirë për t’u zbuluar.
Ai shtoi se problemet fizike dhe psikologjike, përfshirë dëmtimet dhe depresionin, e shtynë drejt një periudhe të errët të jetës, nga e cila nisi të dalë vetëm pas kthimit në Brazil dhe fillimit të terapisë në vitin 2012.
Sot, Cicinho jeton në São Paulo, është i martuar dhe baba i një fëmije, ndërsa punon si komentator televiziv dhe shërben si pastor ungjillor. Ai thotë se ka mbi 14 vite i kthjellët, duke e konsideruar këtë si arritjen më të madhe të jetës së tij pas futbollit.
Sinjali – aty ku e vërteta flet para lajmit!
