1 orë më parë
Një person ka mbetur i vrarë dhe të paktën katër të tjerë janë plagosur nga të shtënat me armë zjarri në rajonin Yvelines, në perëndim të Parisit.
Presidenti francez, Emmanuel Macron, njoftoi të premten se ka ndërruar jetë në vendin e ngjarjes një person.
Ali Rabeh, kryetari i komunës Trappes, në rajonin Yvelines, tha për televizionin BFMTV se një person kishte qëlluar me armë nga vetura e tij.
Sipas tij, i dyshuari dukej se po qëllonte pa dallim dhe se synonte të kryente një masakër, shkruan cnn.
Rabeh bëri të ditur se në mesin e të plagosurve është edhe një vajzë 12-vjeçare. Ai shtoi se i dyshuari jetonte në një qytet aty pranë.
Deri më tani, autoritetet nuk kanë dhënë informacione për motivin e mundshëm të sulmit.
Kryeministri Lecornu shkroi në rrjetin social X se forcat e sigurisë janë mobilizuar plotësisht për të menaxhuar situatën.
Ndërkohë, Prokuroria Kombëtare Kundër Terrorizmit ka konfirmuar se po e monitoron rastin. Megjithatë, deri më tani nuk është bërë e ditur nëse ngjarja do të trajtohet zyrtarisht si akt terrorist. /Telegrafi/
