2 javë më parë
Bashkimi Evropian ka propozuar një sistem të ri komunikimi që do t’u mundësojë policisë, zjarrfikësve dhe shërbimeve të emergjencës të koordinohen më lehtë gjatë krizave ndërkufitare.
Aktualisht, shërbimet e emergjencës në 27 vendet e BE-së përdorin kryesisht radio, por komunikimi i sigurt shpesh ndërpritet sapo ekipet kalojnë kufijtë shtetërorë.
Sistemi i propozuar, i quajtur “EU Critical Communication System”, do të kalojë gradualisht nga radioja te teknologjitë broadband, përfshirë 5G.
Ai do të mundësojë shkëmbimin në kohë reale të videove, mesazheve dhe vendndodhjes.
BE-ja planifikon gjithashtu një qendër të përbashkët për koordinimin e sistemeve kombëtare dhe monitorimin e rreziqeve kibernetike.
Në rast të ndërprerjes së rrjeteve tokësore, satelitët e BE-së do të shërbejnë si rezervë.
Komisioni Evropian përmendi si raste ku sistemi mund të jetë i dobishëm zjarret, operacionet kundër terrorizmit, kërcënimet nga dronët dhe kërkim-shpëtimin në Mesdhe.
Brukseli synon që sistemi të jetë plotësisht funksional deri në vitin 2036, por plani duhet të miratohet nga shtetet anëtare dhe Parlamenti Evropian. /Telegrafi/
