3 muaj më parë
Sulmuesi i Kosovës, Vedat Muriqi, ka mbërritur në Stamboll për të finalizuar rikthimin e tij te Fenerbahçe, duke u pritur nga dhjetëra tifozë entuziastë në aeroport.
Transferimi i 31-vjeçarit u konfirmua më herët nga klubi turk, i cili njoftoi se kishte arritur marrëveshje për rikthimin e futbollistit kosovar dhe se ai do t’i nënshtrohej kontrolleve mjekësore para nënshkrimit zyrtar të kontratës.
Muriqi rikthehet në klubin ku shkëlqeu para transferimit në Serie A, duke fituar vlerësimin e tifozëve me paraqitjet dhe golat e tij. Pas aventurës në Itali dhe viteve të suksesshme te Mallorca në Spanjë, ai vendos të nisë një kapitull të ri në karrierë pikërisht aty ku la gjurmë.
Atmosfera në aeroport ishte festive, me tifozët e Fenerbahçes që e pritën sulmuesin me brohoritje dhe mesazhe mirëseardhjeje, duke treguar entuziazmin për rikthimin e tij.
Muriqi pritet të jetë një nga armët kryesore të skuadrës për sezonin e ri, ndërsa drejtuesit e klubit besojnë se përvoja dhe cilësitë e tij do të forcojnë ndjeshëm repartin ofensiv të ekipit.
Sinjali – aty ku e vërteta flet para lajmit!
