1 muaj më parë
Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar se ka nisur shqiptimin e gjobave ndaj KEDS-it, pasi është konstatuar se kjo kompani nuk ka respektuar afatin e vlefshmërisë së njehsorëve elektrikë.
Pas ankesave të shumta të pranuara nga konsumatorët, Inspektorati Qendror i Mbikëqyrjes së Tregut ka intensifikuar aktivitetet në terren. Përmes verifikimeve të realizuara në laboratorin e Agjencisë së Metrologjisë, është vërtetuar se njehsorët e përdorur nga KEDS ishin jashtë afateve ligjore të verifikimit.
Sipas njoftimit, në mbështetje të Ligjit për Metrologji (neni 46), inspektorati ka shqiptuar gjoba në vlerë prej 1,500 deri në 5,000 euro për secilin njehsor me afat të skaduar të vlefshmërisë.
MINTI ka bërë të ditur se mbetet e përkushtuar në mbrojtjen e të drejtave të qytetarëve dhe trajtimin me prioritet të çdo ankese. Me qëllim të lehtësimit të raportimit të parregullsive, nga sot është funksionalizuar numri mobil i cili pranon ankesa edhe përmes platformës Viber, në çdo kohë:
- Numri i kontaktit: +383 (0) 46 311-000
