3 ditë më parë
Mediat në gjuhën serbe, Informer, Kurir dhe Novosti përmes artikujve të publikuar pretendojnë se kryeministri i Kosovës, Albin Kurti, u ka kërkuar partive shqiptare në Serbi të mbështesin Listën Studentore dhe të formojnë një koalicion paszgjedhor me të, pas zgjedhjeve parlamentare të 25 tetorit 2026.
Takimi mes Kurtit dhe përfaqësuesve të partive shqiptare është konfirmuar publikisht, por pretendimet për marrëveshje të fshehtë, udhëzime politike dhe përfshirjen e kreut të AKI-së nuk mbështeten me prova të mjaftueshme në artikujt e publikuar.
Çka pretendohet?
Përmes tri artikujve të publikuar më 10 tetor 2026, mediat serbe Informer, Kurir dhe Novosti pretendojnë se kryeministri i Kosovës, Albin Kurti, po ndërhyn në procesin zgjedhor në Serbi, duke synuar të sigurojë mbështetje për Listën Studentore, e cila garon në zgjedhjet e parakohshme parlamentare të 25 tetorit.
Informer, në artikullin me titull “Plani i fshehtë i Kurtit dhe listës së bllokuesve!”, pretendon se Kurti ka udhëzuar partitë shqiptare që të mos bashkëpunojnë me Partinë Progresive Serbe (SNS), por të krijojnë një koalicion paszgjedhor me Listën Studentore (shih këtu).
Artikulli pretendon gjithashtu se, gjatë një takimi të mbajtur më 29 shtator në Prishtinë, Kurti ka kërkuar që vendet në komisionet zgjedhore, të cilat u takojnë partive shqiptare, t’i kalojnë Listës Studentore në zonat ku shqiptarët nuk përbëjnë shumicën. Sipas këtij pretendimi, në këtë proces do të përfshiheshin edhe përfaqësues të Lëvizjes së Qytetarëve të Lirë (PSG) dhe partive të tjera.
Një pretendim të ngjashëm e publikon edhe Kurir, me titullin “Albin Kurti vuri shërbimin sekret në funksion për ta rrëzuar Vuçiqin!” (shih këtu). Kjo media pretendon se kreu i Agjencisë së Kosovës për Inteligjencë (AKI), Petrit Ajeti, ishte i pranishëm në takim dhe se Kurti u kishte kërkuar përfaqësuesve të partive shqiptare të mbështesnin Listën Studentore.
Ndërkaq, Novosti pretendon se një marrëveshje e fshehtë mes Kurtit, përfaqësuesve të partive shqiptare dhe Listës Studentore përfshinte bashkëpunim politik dhe organizativ, si dhe ndarjen e vendeve në komisionet zgjedhore (shih këtu).
Çka dihet për takimin e 29 shtatorit në Prishtinë?
Takimi mes Kurtit dhe përfaqësuesve të partive shqiptare nga Presheva, Bujanoci dhe Medvegja është konfirmuar publikisht nga Zyra e Kryeministrit të Kosovës (shih këtu).
Sipas njoftimit zyrtar të Zyrës së Kryeministrit, të publikuar më 29 shtator 2026, takimi u mbajt me ftesë të Kurtit dhe rezultoi me marrëveshjen për një listë të përbashkët zgjedhore, të emërtuar “Koalicioni Shqiptar”, për zgjedhjet parlamentare të Serbisë më 25 tetor.
Në takim morën pjesë udhëheqësit e tetë subjekteve politike shqiptare, Shaip Kamberi nga Partia për Veprim Demokratik (PVD), Visar Memeti nga Alternativa për Ndryshim (APN), Nagip Arifi nga Partia Demokratike (PD), Agim Sabedini nga Partia Demokratike Shqiptare (PDSH), Shqiprim Musliu nga Lëvizja për Progres Demokratik (LPD), Sami Salihu nga Lëvizja për Reforma (LR), Armend Aliu nga Alternativa Shqiptare (AL) dhe Naser Aziri nga Unioni Demokratik Shqiptar (UDSH).
Pra, takimi dhe marrëveshja për bashkimin e partive shqiptare nuk ishin të fshehta. Ato u njoftuan publikisht dhe qëllimi i deklaruar ishte krijimi i një liste të përbashkët për zgjedhjet parlamentare në Serbi.
Ky fakt konfirmon se takimi ka ndodhur, por nuk dëshmon se gjatë tij është arritur ndonjë marrëveshje për mbështetjen e Listës Studentore.
A ishte i pranishëm kreu i AKI-së, Petrit Ajeti?
Një nga pretendimet e rëndësishme të artikujve të mediave serbe Informer dhe Kurir është se në takimin e 29 shtatorit ishte i pranishëm Petrit Ajeti, drejtor i AKI-së.
Megjithatë, në njoftimin zyrtar të Zyrës së Kryeministrit për takimin dhe marrëveshjen e arritur, Ajeti nuk përmendet në mesin e pjesëmarrësve të identifikuar.
Njoftimi identifikon tetë drejtuesit e subjekteve politike dhe përfaqësuesit e tjerë që kontribuuan në marrëveshje, por nuk e përmend kreun e AKI-së. Ndërkohë, artikujt e mediave serbe nuk paraqesin dokument, procesverbal apo dëshmi të drejtpërdrejtë që do ta konfirmonte praninë e tij.
Kjo nuk mjafton për të vërtetuar përfundimisht se Ajeti nuk ka qenë i pranishëm, por do të thotë se pretendimi për pjesëmarrjen e tij nuk është konfirmuar nga burimet publike të shqyrtuara.
Çfarë u diskutua realisht në takim?
Nga deklarata publike e Kurtit rezulton se takimi kishte për qëllim arritjen e një marrëveshjeje për paraqitjen e përbashkët të partive shqiptare në zgjedhjet parlamentare të Serbisë.
Në deklaratën e publikuar nga Zyra e Kryeministrit, Kurti foli për bashkëpunimin politik të shqiptarëve të Preshevës, Bujanocit dhe Medvegjës, përfaqësimin e tyre në Kuvendin e Serbisë dhe çështjet që lidhen me të drejtat e kësaj pakice (shih këtu).
Ai argumentoi se, duke marrë si pikë krahasimi dhjetë ulëset e garantuara për komunitetin serb në Kuvendin e Kosovës, shqiptarët nga këto tri komuna duhet të kenë së paku pesë ulëse të garantuara në Kuvendin e Serbisë.
Kjo deklaratë dokumenton qëndrimin publik të Kurtit për përfaqësimin e shqiptarëve në Serbi. Në të, megjithatë, nuk paraqitet ndonjë udhëzim për mbështetjen e Listës Studentore, ndonjë marrëveshje për koalicion paszgjedhor me të, apo ndonjë plan për transferimin e vendeve në komisionet zgjedhore.
A paraqesin mediat prova për marrëveshjen e pretenduar?
Novosti pretendon se ka pasur qasje në një dokument që përshkruan marrëveshjen e supozuar mes “Koalicionit Shqiptar” dhe Listës Studentore. Sipas artikullit, dokumenti përfshin bashkëpunim politik dhe organizativ, si dhe ndarjen e vendeve në komisionet zgjedhore.
Megjithatë, fakti se një media pretendon se ka parë një dokument nuk mjafton për ta konfirmuar përmbajtjen dhe autenticitetin e tij.
Kurir, nga ana tjetër, i referohet një burimi të paidentifikuar dhe pretendon se informacioni i tij raportohet edhe nga media të tjera. Por riprodhimi i të njëjtit pretendim nga disa portale nuk do të thotë domosdoshmërisht se ekzistojnë disa burime të pavarura që e konfirmojnë atë.
Analiza
Faktet publike konfirmojnë se Albin Kurti u takua më 29 shtator 2026 me përfaqësues të partive shqiptare nga Presheva, Bujanoci dhe Medvegja, dhe se nga ky takim doli marrëveshja për një listë të përbashkët zgjedhore, “Koalicioni Shqiptar”, për zgjedhjet parlamentare në Serbi.
Megjithatë, në burimet zyrtare të shqyrtuara nuk ka dëshmi që konfirmojnë pretendimet e mediave serbe si Informer, Kurir dhe Novosti se Kurti u ka dhënë udhëzime partive shqiptare për të mbështetur Listën Studentore, se ka organizuar një marrëveshje të fshehtë paszgjedhore, apo se ka urdhëruar transferimin e vendeve në komisionet zgjedhore.
Po ashtu, pjesëmarrja e drejtorit të AKI-së, Petrit Ajeti, në takim nuk konfirmohet nga njoftimi zyrtar dhe nuk mbështetet me prova të drejtpërdrejta në artikujt e shqyrtuar.
Bazuar në metodologjinë e punës, hibrid.info i vlerëson këto përmbajtje si “Teori konspirative”.
Arsyetimi
Vlerësim si “Teori konspirative” marrin ato përmbajtje informative të cilat në vete përmbajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre përmbajtje është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
