LVV vendos t’i votojë Çitakun dhe Shalën për nënkryetarë të Kuvendit

Kryesia e Lëvizjes VETËVENDOSJE! ka mbajtur sonte një mbledhje të jashtëzakonshme, ku është diskutuar situata institucionale pas zgjedhjeve të 7 qershorit.
Në një komunikatë për media, LVV ka thënë se vendi ndodhet në një moment vendimtar për të siguruar stabilitet institucional dhe për të shmangur zgjedhjet e reja, të cilat, sipas tyre, do të ishin të katërtat në më pak se dy vjet.
LVV ka bërë të ditur se, në vazhdimin e seancës konstituive që pritet të mbahet nesër në orën 10:00, do t’i votojë kandidatët e PDK-së dhe LDK-së për nënkryetarë të Kuvendit, Vlora Çitakun dhe Kujtim Shalën.
“Megjithëkëtë, kryesia e LVV mori vendim që nesër të votojmë kandidatët e PDK-së dhe LDK-së, Vlora Çitaku dhe Kujtim Shala. Presim që pas konstituimit të Kuvendit ky hap i vullnetit të mirë të reflektojë në konstruktivitet të tyre duke votuar për president, qoftë ajo edhe votë kundër”, thuhet në komunikatë.
Sipas LVV-së, ky vendim vjen si shprehje e vullnetit për të tejkaluar ngërçin institucional. Partia në pushtet ka rikujtuar edhe situatën pas zgjedhjeve të 9 shkurtit 2025, kur, sipas saj, kishte 57 deputetë së bashku me partnerët e koalicionit parazgjedhor dhe deputetët e komuniteteve, por iu deshën disa muaj për të konstituar Kuvendin.
LVV pretendon se, duke zbatuar aktgjykimin e Gjykatës Kushtetuese, kishte ndryshuar katër herë kandidatin për kryetar të Kuvendit, para se Dimal Basha të zgjidhej në këtë pozitë më 26 gusht, pesë muaj pas certifikimit të rezultateve të zgjedhjeve.
“E pra, ne kemi vendosur t’i votojmë Vlora Çitakun e Kujtim Shalën, edhe nëse nuk i ndërrojnë emrat e kandidatëve qysh bëmë ne”, thuhet më tej në komunikatë.
LVV ka bërë të ditur se deputetët e saj do ta votojnë Çitakun sapo PDK-ja ta ripropozojë kandidaturën e saj në seancën e nesërme.
Në fund, LVV ka shprehur pritjen që edhe Kujtim Shala, si nënkryetar i ardhshëm i Kuvendit, të marrë pjesë në seancën ku pritet të votohet për Bekim Sejdiun si president, sipas marrëveshjes LVV-LDK.