Largimi nga Kombëtarja i kushton shtrenjtë Ronaldos, rrezikon pezullim deri në 6 muaj

Cristiano Ronaldo rrezikon të dënohet me pezullim nga një deri në gjashtë muaj, si dhe me gjobë financiare, pas largimit nga grumbullimi i Kombëtares së Portugalisë.

Sipas mediave portugeze, të cilat i referohen Kodit të Disiplinës së Federatës Portugeze të Futbollit, futbollisti mund të përballet me këtë masë nëse largimi nga grumbullimi është bërë pa arsye të justifikuar.

“Futbollisti i grumbulluar rregullisht me Kombëtaren, i cili largohet ose mungon pa arsye të justifikuar në një stërvitje, ndeshje apo aktivitet të ekipeve kombëtare, ose në një veprimtari që lidhet me përfaqësimin sportiv të FPF-së apo të Portugalisë, dënohet me pezullim nga një deri në gjashtë muaj dhe, si masë shtesë, nëse bëhet fjalë për futbollist profesionist, me gjobë me rreth 500 deri në 1.000 euro”, theksohet në Kodin e Disiplinës së Federatës Portugeze.

Po ashtu, pika 2 e nenit 160 të këtij kodi parashikon se mungesa ose largimi i futbollistit sjell automatikisht pezullimin e përkohshëm, në përputhje me rregulloren.

Situata vjen pas disa ditësh tensionesh rreth kapitenit të Portugalisë.

Ronaldo ishte titullar në fitoren e Portugalisë ndaj Uellsit, në ndeshjen e parë të Grupit A4 të Nations League.

Megjithatë, në përballjen me Norvegjinë, ai qëndroi në stol gjatë gjithë ndeshjes.

Pas përfundimit të takimit, Ronaldo nuk qëndroi me pjesën tjetër të skuadrës për të përshëndetur tifozët, por u drejtua menjëherë në dhomat e zhveshjes, duke shfaqur pakënaqësinë e tij.

Sinjali – aty ku e vërteta flet para lajmit!

/GazetaSinjali/