Kontroll të shtuar për shitjet online: MINTI mblodhi përfaqësuesit e postave të shpejta

Departamenti për Mbrojtjen e Konsumatorit në Ministrinë e Industrisë, Ndërmarrësisë, Tregtisë e Inovacionit (MINTI) zhvilloi sot një takim me përfaqësuesit e kompanive të postave të shpejta në kuadrin e përgatitjeve për shtimin e kontrolleve për bizneset që shesin online, të paralajmëruara të fillojnë më 1 nëntor.

Në takim morën pjesë nga ana e MINTI-t: Ali Tafarshiku, këshilltar i ministres Mimoza Kusari-Lila, dhe Florent Kuçi, UD i DP të Inspektoratit Qendror për Mbikëqyrjen e Tregut dhe Jehon Kadrija, zyrtar në Departamentin për Mbrojtjen e Konsumatorit në MINTI.

Ministria ka paralajmëruar prej kohësh se do të intensifikojë kontrollet ndaj bizneseve që shesin online, duke filluar nga 1 nëntori. Meqenëse shumica e këtyre bizneseve përdorin shërbimet e postave të shpejta për të dërguar produktet te blerësit fundorë, ky takim u konsiderua i domosdoshëm për koordinimin e procesit.

Mbrojtja e konsumatorit në qendër të nismës

Sipas legjislacionit në fuqi, kompanitë e postave të shpejta janë të detyruara të mbajnë shënime lidhur me pakot që transportojnë, artikujt brenda tyre, biznesin shitës, si dhe palën fundore blerëse. Në funksion të këtyre detyrimeve ligjore, në takim ishin ftuar edhe përfaqësuesit nga ARKEP – Rregullatori i Shërbimeve Postare në Kosovë.

Përveç tyre, në takim morën pjesë edhe përfaqësuesit e Bankës Qendrore të Kosovës dhe të Administratës Tatimore të Kosovës, duke marrë parasysh se në shumicën e shitjeve online pagesat nuk realizohen online në momentin e porosisë, por me pranimin e porosisë nga klienti – në shumicën e rasteve në para të gatshme.

MINTI: Krah qytetarit dhe bizneseve

Përmes kësaj iniciative, Ministria synon të kontribuojë edhe për mbrojtjen e konsumatorit edhe për të qenë në krah të bizneseve, për të kontribuar në zvogëlimin e informalitetit. Synohet koordinimi institucional për të garantuar mbrojtjen e plotë të të drejtave të konsumatorëve, formalizimi i ekonomisë dhe transparencën e tregut të shitjeve online, para nisjes së kontrolleve të shtuara në nëntor. /KosovaNews/