2 javë më parë
Publikohet një imazh me mbishkrimin ku paraqitet një reklamë me anë të cilës kërkohen punëtorë, të cilët do të paguhen nga 50 deri në 200 euro në ditë, për kryerjen e detyrave të thjeshta.
Në përmbajtjen e publikuar të hënën (4 maj) në Facebook nga një faqe me emrin “Vicent store” pretendohet se nuk nevojitet trajnim dhe se mjafton posedimi i një telefoni.
Dizajni po ashtu, ka përdorur elemente si emblema/flamuri i Kosovës.
Çka nuk shkon me përmbajtjen?
Përmbajtja në fjalë është mashtrim.
Hibrid.info së pari ka kontrolluar burimin e publikimit të përmbajtjes.
Llogaria që ka publikuar postimin numëron vetëm 20 ndjekës dhe ka aktivitet të kufizuar me shumë pak përmbajtje të publikuar. Postimi në fjalë është shpërndarë si reklamë e sponsorizuar. Sipas të dhënave të faqes, ajo është kategorizuar si “Bankë për konsumatorin”. Megjithatë, mungojnë informacione apo dëshmi që do të vërtetonin se bëhet fjalë për një kompani të regjistruar ose agjenci legjitime rekrutimi.
Kjo faqe është krijuar më 13 nëntor 2025.
Së dyti, hibrid.info hulumtoi për kriteret që duhet të ketë një përshkrim i një konkursi pune.
Bazuar në standardet e U.S. Chamber of Commerce (Dhoma e Tregtisë së SHBA-së), një konkurs pune duhet të jetë i strukturuar në mënyrë që të ofrojë qartësi maksimale. Një konkurs kredibil, duhet të përmbajë: titullin e saktë të pozitës që kërkohet, informacione për kompaninë apo institucionin që ka hapur konkursin, përshkrimi i detyrave të kërkuara, kualifikimet dhe shkathtësitë e nevojshme për punë, detajet e lokacionit dhe orarit, struktura e kompensimit dhe procesi i aplikimit.
A i plotëson këto standarde ky publikim?
Ky publikim shfaq mungesë të theksuar profesionalizmi dhe transparence, duke filluar nga përdorimi i paautorizuar i stemës shtetërore në mungesë të një emri zyrtar të kompanisë. Paqartësia vërehet edhe në definimin e pozicionit, ku përmenden tre tituj të ndryshëm (asistent, menaxher dhe trajtues porosish) pa specifikuar detyrat konkrete apo mjetet e punës. Për më tepër, njoftimi nuk përcakton asnjë kriter kualifikues profesional, lokacion apo orar zyrtar, ndërsa procesi i aplikimit devijon nga standardet e industrisë duke i drejtuar kandidatët drejt bisedave private në vend të platformave zyrtare të rekrutimit.
Duke u bazuar kjo mungesë e plotësimit të kritereve të kërkuara dhe nga përvoja nga trajtimet e mëhershme të përmbajtjeve të tilla (shih këtu dhe këtu), hibrid.info ka vlerësuar se kjo përmbajtje dyshohet të jetë mashtruese.
Çka i karakterizon përmbajtjet mashtruese ku kërkohen punëtorë?
Sipas FTC (Komisionit Federal të Tregtisë), institucion qeveritar i Shteteve të Bashkuara të Amerikës (ShBA-së) mashtrimet me punësimin janë skema ku mashtruesit premtojnë punë me fitime të larta për t’ju vjedhur paratë ose informacionin personal.
Këto përmbajtje premtojnë para të shpejta me reklama që garantojnë se do të fitoni shumë para brenda pak kohësh (p.sh. “fito mijëra euro nga shtëpia”).
Ato mund të ju bëjnë kërkesa për pagesë paraprake dhe intervista që bëhen vetëm përmes mesazheve (WhatsApp, Telegram) pa takime fizike apo video-thirrje zyrtare.
Mashtrimet më të shpeshta janë: ato që ju premtojnë punë nga shtëpia (Data Entry/Reshipping), ku ju kërkojnë të paketoni produkte ose të futni të dhëna, por shpesh përfundoni duke ndihmuar në dërgimin e mallrave të vjedhura;
Mashtrimet me çeqe ku ju dërgojnë një çek, të cilin kërkojnë ta depozitoni dhe të dërgoni një pjesë të parave mbrapsht për “pajisje”. Çeku më vonë rezulton i rremë dhe ju mbeteni me borxh në bankë;
Dhe blerësit sekretë (Mystery Shoppers) ku ju kërkojnë të vlerësoni shërbime të transfertave të parave (si Western Union) duke dërguar paratë tuaja.
Si të mbroheni?
FTC sugjeron që të hulumtoni për emrin e publikuesit bashkë me fjalët “scam”, “review” ose “complaint”.
Mos jepni të dhëna personale menjëherë. Pra, mos dërgoni numrin e llogarisë bankare apo numrin e letërnjoftimit pa u vërtetuar se kompania është reale.
Flisni me dikë apo konsultohuni me një mik apo familjar përpara se të pranoni një ofertë që duket “tepër e mirë për të qenë e vërtetë”.
Nëse tashmë jeni mashtruar ndaloni kontaktin dhe mos komunikoni më me mashtruesit. Po ashtu, nëse keni bërë pagesa ose keni dhënë të dhëna bankare, njoftoni menjëherë institucionin tuaj financiar dhe denonconi mashtrimin te autoritetet përkatëse (Policia e Kosovës).
Analiza:
Një postim i publikuar në Facebook pretendon se ofrohet punë online me pagesë nga 50 deri në 200 euro në ditë për kryerjen e “detyrave të thjeshta”, pa pasur nevojë për trajnim dhe vetëm me posedimin e një telefoni.
Pas verifikimit, rezultoi se faqja që ka publikuar postimin ka vetëm 20 ndjekës, aktivitet të kufizuar dhe mungesë të informatave që do të dëshmonin se bëhet fjalë për një kompani të regjistruar apo agjenci legjitime rekrutimi. Po ashtu, postimi është shpërndarë si reklamë e sponsorizuar dhe faqja është e kategorizuar si “Bankë për konsumatorin”, pa ofruar të dhëna të qarta për identitetin e subjektit që pretendon të ofrojë punësim.
Përmbajtja gjithashtu nuk përmban elementet bazike që karakterizojnë një konkurs kredibil pune, si emri i kompanisë, përshkrimi i qartë i pozitës, kriteret e punësimit, lokacioni, orari apo procedura zyrtare e aplikimit. Në vend të tyre, përdoren premtime për fitime të shpejta dhe komunikim përmes mesazheve private, elemente që shpesh i karakterizojnë skema mashtruese të punësimit online.
Andaj, bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
