2 ditë më parë
Në mediat sociale Facebook dhe TikTok janë publikuar imazhe përmes të cilave pretendohet se paraqiten pamje nga protestat e studentëve të mbajtura më 13 tetor në Tiranë.
Dy prej imazheve paraqesin ndërtesën e Bashkisë së Tiranës të përfshirë nga flakët, ndërsa një tjetër paraqet pjesëtarë të policisë duke sulmuar një person të shtrirë në tokë.
Çka nuk shkon me këto përmbajtje?
Verifikimi i fakteve nga hibrid.info ka vërtetuar se imazhet nuk janë fotografi reale nga protesta, por janë gjeneruar përmes inteligjencës artificiale (IA).
FAKTET
Dy imazhet që paraqesin ndërtesën e Bashkisë së Tiranës në flakë janë publikuar nga llogari në Facebook dhe TikTok (shih këtu dhe këtu).
Verifikimi i këtyre imazheve përmes platformës për detektimin e përmbajtjeve të gjeneruara me IA, “Hivemoderation.com”, tregon se ato janë krijuar me inteligjencë artificiale (shih fotografitë më poshtë).
Është e vërtetë se gjatë protestës së 13 tetorit në Tiranë, disa protestues hynë në ndërtesën e Bashkisë së Tiranës, pasi thyen derën hyrëse, dhe ndezën flakadanë brenda saj. Kjo dëshmohet edhe nga pamjet e publikuara nga Euroneës Albania (shih këtu). Megjithatë, fotografitë e krijuara me IA paraqesin një skenë të ndryshme nga ajo e dokumentuar, duke krijuar përshtypjen se zjarri ka përfshirë në tërësi ambientet e brendshme të ndërtesës.
Edhe imazhi tjetër i publikuar në Facebook (shih këtu), i cili paraqet pjesëtarë të policisë duke sulmuar një person të shtrirë në tokë, është gjeneruar me inteligjencë artificiale.
Analiza e këtij imazhi përmes platformës “Hivemoderation.com” rezulton me 99% probabilitet që ai të jetë gjeneruar me IA (shih fotografinë më poshtë).
Pak kontekst
Më 13 tetor, studentë dhe qytetarë protestuan në Tiranë, duke kërkuar përmirësimin e kushteve në universitete, lehtësimin e kostove të studimit dhe dorëheqjen e qeverisë së Edi Ramës. Protesta u shoqërua me përplasje mes protestuesve dhe policisë.
Ajo u ndërthur me lëvizjen “Revolucioni Flamingo”, e cila nisi në shenjë kundërshtimi ndaj projekteve turistike në Zvërnec dhe Sazan, për shkak të shqetësimeve mjedisore dhe dyshimeve për korrupsion. Më pas, kërkesat e kësaj lëvizjeje u zgjeruan edhe në thirrje për largimin e qeverisë.
Analiza
Në mediat sociale Facebook dhe TikTok janë publikuar imazhe të gjeneruara me inteligjencë artificiale (IA), të cilat pretendohet se paraqesin pamje nga protestat e studentëve të mbajtura më 13 tetor në Tiranë.
Dy prej tyre paraqesin ndërtesën e Bashkisë së Tiranës të përfshirë nga flakët, ndërsa një tjetër tregon policë duke sulmuar një person të shtrirë në tokë.
Verifikimi përmes platformës Hivemoderation.com tregon se imazhet janë krijuar me IA.
Ndonëse gjatë protestës disa demonstrues ndezën flakadanë brenda ndërtesës së bashkisë, imazhet e publikuara paraqesin skena që nuk përputhen me pamjet e dokumentuara të ngjarjes.
Bazuar në metodologjinë e punës, hibrid.info i vlerëson këto përmbajtje si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
