Hoffenheim “blindon” Albian Hajdarin me kontratë të re deri në vitin 2031

Hoffenheim dhe mbrojtësi i Kosovës, Albian Hajdari, kanë arritur marrëveshje për një kontratë të re të përmirësuar, e cila e mban futbollistin te klubi gjerman deri në vitin 2031.

Sipas gazetarit Florian Plettenberg, Hajdari ka nënshkruar tashmë marrëveshjen e re, duke e “blinduar” të ardhmen e tij te Hoffenheimi, pas paraqitjeve të mira si me klubin ashtu edhe me përfaqësuesen e Kosovës.

“Albian Hajdari me kontratë të re, e kryer. Marrëveshje e kompletuar”.

“Kontrata vazhdohet edhe për dy vite, deri më 2031. Paga rritet, gjithçka e nënshkruar. Nuk ka klauzolë lirimi”, raporton ai.

Hajdari ka tërhequr vëmendjen e disa skuadrave të mëdha evropiane, por klubi gjerman ka vendosur ta mbajë duke i ofruar kushte më të mira dhe kontratë afatgjate.

Ndërkohë, Hoffenheimi pritet t’i ofrojë rinovim edhe mesfushorit Leon Avdullahu, i cili gjithashtu është në radar të klubeve të mëdha evropiane.

Ndryshe, situatë e ndryshme pritet të jetë për Fisnik Asllanin, i cili sipas raportimeve pritet të largohet në verë, pasi kërkohet nga klube si Barcelona, Bayern Munich dhe Borussia Dortmund.

Sinjali – aty ku e vërteta flet para lajmit!

/GazetaSinjali/