Hakimi në krye të Marokut për Botërorin 2026

Përzgjedhësi i Marokut, Mohamed Ouahbi, ka publikuar listën përfundimtare prej 26 futbollistësh për Kupën e Botës 2026, me kombëtaren afrikane që synon një tjetër paraqitje të suksesshme në skenën botërore.

Në mesin e të ftuarve është edhe ylli i Paris Saint-Germainit, Achraf Hakimi, i cili po rikuperohet nga një lëndim i pësuar në gjysmëfinalen e Ligës së Kampionëve ndaj Bayern Munichut. Pjesë e listës është edhe mesfushori i Real Madridit, Brahim Diaz, i cili kishte humbur penallti në finalen e Kupës së Afrikës në janar.

Megjithatë, në skuadër mungojnë disa nga futbollistët që ishin pjesë e ekipit historik të vitit 2022, kur Maroku arriti deri në gjysmëfinale të Kupës së Botës në Katar nën drejtimin e Walid Regraguit.

Kësaj radhe, kombëtarja marokene do të drejtohet nga Mohamed Ouahbi, trajneri 49-vjeçar i lindur në Belgjikë.

Hakimi pritet të jetë lideri i skuadrës dhe do ta mbajë shiritin e kapitenit në Botërorin që nis më 11 qershor. Për shkak të angazhimit me kombëtaren, ai do t’i mungojë PSG-së në finalen e Ligës së Kampionëve kundër Arsenalit.

Sinjali – aty ku e vërteta flet para lajmit!

/GazetaSinjali/