1 ditë më parë
Ministri i Punëve të Jashtme dhe Evropiane i Kroacisë, Gordan Grliq Radman, ka hedhur poshtë akuzat e Beogradit për ndërhyrje në procesin zgjedhor në Serbi, duke e cilësuar notën serbe të protestës si të pazakontë dhe të motivuar nga fushata zgjedhore, shkruan Telegrafi.
Sipas sipas mediave në rajon, ai tha se nuk kishte marrë dokument diplomatik më të çuditshëm që nga marrja e detyrës, transmeton Telegrafi.
Ministria e Jashtme e Serbisë ia kishte dërguar notën Zagrebit më 14 tetor. Sipas Index.hr, që citon Radiotelevizionin e Serbisë, në të kundërshtohen përpjekjet për ndikim të jashtëm në zgjedhje dhe mënyra të caktuara të raportimit të mediave kroate për zhvillimet politike në Serbi.
Grliq Radman sugjeroi se reagimi kishte motive të brendshme politike dhe lidhje të qarta me fushatën zgjedhore.
Ai theksoi se Kroacia është shtet demokratik, ku liria e medias përbën një nga liritë themelore evropiane. Sipas tij, këtë parim duhet ta respektojë çdo vend që synon anëtarësimin në Bashkimin Evropian.
“Nuk ia vlen të harxhohen fjalë për këtë”, deklaroi ministri, duke shtuar se Zagrebi ka prioritete më të rëndësishme.
Ndërkohë, kryeministri kroat Andrej Plenkoviq, nga Brukseli, i hodhi poshtë pretendimet se Kroacia po ndërhyn në garën zgjedhore në Serbi.
Zgjedhjet e jashtëzakonshme parlamentare në Serbi janë caktuar për 25 tetor./Telegrafi/
