Goodwin nuk ka thënë se zëvendëspresidenti i SHBA-së është interesuar për protestat në Kosovë

Në TikTok është publikuar një përmbajtje me pretendimin se kolumnisti i New York Post, Michael Goodwin, ka thënë se protestat në Kosovë kundër vendimit të Gjykatës Speciale kanë filluar të kenë efekt dhe se zëvendëspresidenti i SHBA-së, JD Vance, është interesuar personalisht për këto protesta dhe për procesin në Hagë.

Në përmbajtjen e publikuar shkruan:

“Gazetari i New York Post, Michael Goodwin: Protestat e vazhdueshme kundër vendimit të Gjykatës Speciale kanë filluar të kenë efekt. Burimet e mia tregojnë se zëvendëspresidenti i SHBA-së, JD Vance, dje është interesuar personalisht për këto protesta dhe për procesin në Hagë”.

Çka nuk shkon me pretendimin?

Pas verifikimit të fakteve të kryer nga hibrid.info, nuk është gjetur ndonjë artikull, deklaratë apo intervistë të Michael Goodwin në të cilën ai të ketë bërë një deklaratë të tillë (shih këtu).

Goodwin është kolumnist i New York Post. Në publikimet e tij të fundit në këtë medium, temat e trajtuara lidhen kryesisht me zhvillimet politike në SHBA, New York-un, administratën Trump, Izraelin dhe Lindjen e Mesme (shih këtu).

Në publikimin e tij të datës 29 shtator 2026, ai trajton strategjinë e kryetarit të New York-ut, Zohran Mamdani, për luftimin e antisemitizmit, dhe nuk përmend Kosovën, Gjykatën Speciale apo JD Vance në lidhje me këto zhvillime (shih këtu).

Po ashtu, në kërkimet e bëra në New York Post dhe në burime të tjera në internet nuk është gjetur ndonjë publikim i Goodwin-it që përmban pretendimin e publikuar në TikTok.

Analiza

Michael Goodwin është kolumnist i New York Post, por nuk është gjetur ndonjë shkrim apo deklaratë e tij që përmban pretendimin e publikuar në TikTok.

Një arkiv i shkrimeve të tij në New York Post tregon publikimet e Goodwin-it dhe temat e trajtuara prej tij gjatë vitit 2026.

Pretendimi i publikuar në TikTok është i pambështetur me fakte dhe i atribuon Michael Goodwin një deklaratë për të cilën nuk është gjetur burim. Bazuar në metodologjinë e punës, hibrid.info e vlerëson këtë përmbajtje si “Lajm i rremë”.

Arsyetimi

Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.