5 muaj më parë
Basketboll
Sinjali.com
21 Prill 2026 16:08
Pas përfundimit të sezonit të rregullt në Superligë dhe ndeshjeve çerekfinale të “Play-off”-it, vëmendja tashmë zhvendoset te gjysmëfinalet, përkatësisht faza Final 4, ku katër skuadrat më të mira do të luftojnë për titullin e kampionit.
Katër ekipe synojnë trofeun më të rëndësishëm të sezonit, në një garë që pritet të jetë e fortë dhe e rivalizuar deri në fund.
Gjysmëfinalja e parë zhvillohet të mërkurën nga ora 19:30, ku përballen Bashkimi dhe Bora, në një duel që pritet të jetë shumë interesant. Në sezonin e rregullt, prizrenasit e përfunduan kampionatin në vendin e dytë, ndërsa prishtinasit në të tretin. Bora siguroi kualifikimin në këtë fazë pasi eliminoi Sigal Prishtinën në çerekfinale.
Bashkimi ka fituar vetëm një herë titullin e kampionit, në vitin 2018, ndërsa për Borën ky është një edicion historik, pasi për herë të parë ka arritur të kualifikohet në garat shtesë.
Ndërkohë, gjysmëfinalja tjetër zhvillohet të enjten nga ora 19:30, ku përballen rivalët e vjetër, Trepça dhe Peja.
Skuadra nga Mitrovica e përfundoi sezonin e rregullt në vendin e parë dhe mban titullin e kampionit aktual, si dhe është fituese e Kupës. Në anën tjetër, Peja synon rikthimin te trofetë e rëndësishëm.
Trepça regjistroi 25 fitore dhe tri humbje gjatë sezonit të rregullt, ndërsa Peja e mbylli kampionatin në vendin e pestë, por në çerekfinale arriti të eliminojë Golden Eagle Yllin pas tri ndeshjeve.
Sa i përket historikut, Trepça ka fituar gjashtë tituj kampioni, përfshirë dy edicionet e fundit, ndërsa Peja ka pesë tituj, me të fundit të fituar në vitin 2023.
Sinjali – aty ku e vërteta flet para lajmit!
