17 orë më parë
Gjermania po i bën presion Kroacisë që të zgjidhë mosmarrëveshjet me Malin e Zi, nga frika se ato mund të pengojnë procesin e anëtarësimit të Podgoricës në Bashkimin Evropian (BE).
Sipas raportimeve të mediave, Berlini kërkon nga Zagrebi një qasje më konstruktive ndaj çështjeve të hapura mes dy vendeve, në mënyrë që ato të mos e bllokojnë rrugën evropiane të Malit të Zi.
Kroacia së fundmi i ka paraqitur Malit të Zi një listë me tetë çështje që, sipas Zagrebit, duhet të zgjidhen para përfundimit të negociatave të anëtarësimit. Ato përfshijnë mosmarrëveshje historike, krimet e luftës, personat e zhdukur, çështjet pronësore dhe kufirin mes dy vendeve.
Kryeministri kroat, Andrej Plenkoviq, ka deklaruar se Zagrebi prej vitesh i ka ngritur këto çështje me autoritetet malazeze, duke pretenduar se gjatë dy viteve të fundit nuk është shënuar përparim i mjaftueshëm në zgjidhjen e tyre.
Ndërkohë, qeveria gjermane ka ofruar ndërmjetësim mes dy vendeve, në përpjekje për të parandaluar përshkallëzimin e mosmarrëveshjeve dhe bllokimin e procesit të integrimit evropian.
Edhe Komisioni Evropian është përfshirë në përpjekjet për të gjetur një zgjidhje, ndërsa disa shtete anëtare të BE-së po mbështesin dialogun mes Zagrebit dhe Podgoricës.
Mali i Zi konsiderohet një nga vendet kandidate më të avancuara në procesin e integrimit evropian dhe synon anëtarësimin në BE deri në vitin 2028. Podgorica ka mbyllur përkohësisht një pjesë të kapitujve negociues, por mosmarrëveshjet me Kroacinë mund ta vështirësojnë përmbushjen e këtij objektivi.
Në Berlin ekziston shqetësimi se një bllokim i mundshëm i Malit të Zi do të dërgonte sinjal negativ edhe për vendet e tjera kandidate, duke vënë në pikëpyetje besueshmërinë e politikës së zgjerimit të Bashkimit Evropian.
Për këtë arsye, Gjermania po kërkon që çështjet dypalëshe të zgjidhen përmes dialogut dhe të mos shndërrohen në pengesë për procesin e anëtarësimit. /Telegrafi/
