Gjendje ushtarake në rast të humbjes së zgjedhjeve - plani i aleatëve të Trumpit

Aktivistë konservatorë të afërt me presidentin amerikan, Donald Trump, po bëjnë thirrje që ai të shqyrtojë masa të jashtëzakonshme, përfshirë shpalljen e gjendjes ushtarake, nëse republikanët humbin zgjedhjet e mesmandatit në nëntor.

Sipas raportimeve të mediave amerikane, një grup aktivistësh të lëvizjes MAGA po kërkon që administrata Trump të ndërhyjë në procesin zgjedhor, duke pretenduar pa prova se mund të ketë manipulime të votave.

Në një videokonferencë të mbajtur më 30 shtator, e cila u transmetua në platformën Rumble, disa figura të njohura të këtij kampi diskutuan masa si përdorimi i fletëvotimeve në letër, numërimi manual i votave dhe pezullimi i zgjedhjeve në rast të pretendimeve për probleme me sigurinë zgjedhore.

Ndër personat që kanë kërkuar masa më të ashpra janë aktivistja Tina Peters, ish-këshilltari i Trumpit, Steve Bannon, si dhe mbështetës të tjerë që prej vitesh vënë në pikëpyetje besueshmërinë e sistemit zgjedhor amerikan.

Disa prej tyre kanë propozuar që Trumpi të shpallë gjendje të jashtëzakonshme kombëtare, të kufizojë përdorimin e makinave elektronike për votim dhe të kërkojë numërimin manual të fletëvotimeve, shkruan axios.

Avokati Peter Ticktin ka shkuar edhe më tej, duke deklaruar se, nëse rezultatet zgjedhore vihen në pikëpyetje, në një moment mund të kërkohet shpallja e gjendjes ushtarake.

Megjithatë, ekspertët ligjorë theksojnë se presidenti amerikan nuk ka kompetenca të pakufizuara për të marrë kontrollin e zgjedhjeve. Sipas Kushtetutës amerikane, organizimi i tyre është kryesisht përgjegjësi e autoriteteve shtetërore dhe lokale, në përputhje me ligjet federale.

Propozimet kanë nxitur shqetësime te organizatat për të drejtat e votuesve dhe ekspertët, të cilët paralajmërojnë se përpjekjet për të ndërhyrë në administrimin e zgjedhjeve mund të dëmtojnë besimin e publikut në procesin demokratik.

Zgjedhjet e mesmandatit në SHBA do të mbahen në nëntor, ndërsa republikanët përballen me mundësinë e humbjes së kontrollit të Kongresit. Megjithatë, deri më tani nuk ka prova që mbështesin pretendimet për manipulim të zgjedhjeve të ardhshme. /Telegrafi/