3 javë më parë
“Nē momentin kur Vjosa Osmani u afrua me Trumpin, Sorosi, bashkē me Kurtin, tē cilit dikur ia financuan shkollimin, u takuan nē kafiterinē “La Cabra” nē Manhattan, New York, dhe aty u bē plani pēr eliminimin e saj”.
Kështu pretendohet të ketë deklaruar gazetari amerikano John Roberts, sipas një imazhi të publikuar të mërkurën (6 maj) në Facebook, nga faqja me emrin “Mërgata me LDK-në”.
Çka nuk shkon me përmbajtjen?
Hibrid.info gjeti se deklarata e pretenduar është e sajuar.
Faqja që ka publikuar postimin ka mbi 7 mijë ndjekës dhe publikon përmbajtje në mbështetje të Lidhjes Demokratike të Kosovës (LDK-së).
Deri në momentin e trajtimit përmbajtja ka nxitur reagime duke marrë mbi 240 pëlqime dhe mbi 150 shpërndarje. Ndërsa në bazë të përmbajtjes në disa komente, mund të vlerësohet se ekziston mundësia që audienca ta perceptojë pretendimin si të besueshëm.
Hibrid.info është fokusuar në konfirmimin e ekzistencës së deklaratës, jo në verifikimin e pretendimeve që ajo përmban.
Së pari, hibrid.info ka hulumtuar për gazetarin në fjalë me anë të makinës së kërkimit “Google” (shih këtu). Rezultatet treguan se John Roberts është gazetar, i cili aktualisht shërben si bashkë-prezantues i America Reports në FOX News Channel (FNC) (shih këtu).
Më pas hibrid.info kontrolloi në rrjetet sociale të gazetarit dhe vërejti se ai zakonisht shpreh opinionet në llogarinë e tij në platformën “X” (shih këtu). Nga postimet e tij të kohëve të fundit, nuk është hasur ndonjë, ku ai të ketë shprehur qëndrime për situatën në Kosovë.
Hibrid.info gjithashtu, nëpërmjet “Google”, kërkoi për artikuj ku mund të shfaqin ndonjë deklaratë të mundshme të gazetarit amerikano-kanadez, ku përmendet Vjosa Osmani ose Albin Kurti, por diçka të tillë rezultatet nuk e shfaqën (shih këtu).
Rezultatet të ngjashme solli edhe kërkimi në “Google” për tërë deklaratën e pretenduar (shih këtu).
Hibrid.info shpesh ka trajtuar deklarata politike të sajuara dhe madje kishte publikuar një artikull analizues që shpjegonte se si disa prej tyre publikohen me qëllim lartësimin e politikanëve në Kosovë. Ato publikohen që të konfirmojnë bindjet ekzistuese të audiencës, duke shfrytëzuar autoritetin e figurave apo institucioneve të njohura, për të aktivizuar kështu mekanizmat intuitivë të besueshmërisë (shih këtu).
Analiza:
Një imazh i publikuar në Facebook pretendon se gazetari amerikano-kanadez John Roberts ka deklaruar se George Soros dhe Albin Kurti janë përfshirë në një takim në New York, ku dyshohet se është diskutuar një “plan për eliminimin politik” të presidentes Vjosa Osmani.
Pas verifikimit, rezultoi se nuk ekziston asnjë deklaratë publike apo e dokumentuar nga gazetari John Roberts që e mbështet këtë pretendim, as në mediat ku ai punon dhe as në rrjetet e tij sociale.
Po ashtu, kërkimet në Google për deklaratën e pretenduar dhe për kombinimin e emrave të përmendur nuk kanë nxjerrë asnjë rezultat nga burime të besueshme që ta konfirmojnë ekzistencën e deklaratës së pretenduar.
Andaj, bazuar në metodologjinë e punës, hibrid.info e vlerëson përmbajtjen në fjalë si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
