2 javë më parë
Futboll
Sinjali.com
14 Maj 2026 16:25
Ministri i Mbrojtjes i Izraelit, Israel Katz, ka reaguar publikisht ndaj futbollistit të Barcelonës, Lamine Yamal, pasi ylli i ri u pa duke mbajtur një flamur palestinez gjatë paradës së klubit katalanas për festimin e titullit kampion.
Në një deklaratë të publikuar në gjuhën spanjolle, Katz e akuzoi Yamalin se po nxit përçarje në një kohë kur Izraeli është i përfshirë në konflikt.
“Lamine Yamal ka zgjedhur të dalë kundër Izraelit dhe të nxisë urrejtje në një kohë kur ushtarët tanë po luftojnë organizatën terroriste Hamas, e cila më 7 tetor [2023] kreu vrasje masive, dhunime dhe dogji fëmijë, gra dhe të moshuar hebrenj”, shkroi Katz.
“Ata që i mbështesin veprime të tilla duhet ta pyesin veten: a e konsideroni këtë njerëzore? A është kjo morale?”, shtoi ai.
Reagimi i ministrit izraelit vjen pasi në rrjetet sociale qarkulluan pamje të Yamalit me flamurin palestinez gjatë festimeve të Barcelonës, ndërsa mediat raportuan edhe për një mural të futbollistit që është shfaqur në Gaza.
Katz deklaroi se nuk do të heshtë përballë asaj që ai e cilëson si nxitje kundër popullit hebre, duke i bërë thirrje Barcelonës të mbajë një qëndrim zyrtar lidhur me rastin.
“Si Ministër i Mbrojtjes i Izraelit, nuk do të qëndroj i heshtur përballë nxitjes kundër Izraelit dhe popullit hebre”.
“Shpresoj që një klub aq i madh dhe i respektuar sa Barcelona të distancohet nga këto deklarata dhe të shpallë qartë dhe pa mëdyshje tolerancë zero ndaj nxitjes apo mbështetjes së terrorizmit”, ka thënë Katz.
Sinjali – aty ku e vërteta flet para lajmit!
